Bah Monarch Shabong
Hap ai burom ia ka dorbar jong ka Shnong Lumshnong, ba ka pyni ha ka sien nyngkong ia ka bor lane ka iktiar jong ka Dorbar Shnong bad kane ka rai jong ka dorbar Shnong, ka donkam khlem pynslem ia ka jing ai khublei na ka Synjuk ki khlieh nongsynshar shnong lane na ka seng ki nong synshar Hima bad kumjuh na ka bor jong ka Jaintia bad Khasi District Council.
Ha kine ki sngi, ngim pat ju lap ba ka bor jong ka dorbar Shnong, kan khlain bor haduh katne, hynrei la ju lap ba ki Rangbah Shnong, ki la khylliap lypa kum ka slawang ha ka bor jong ki pulit rit, ki ophisar rit, khlem da iakren ia ka bor jong u khlieh jong ka District.
Ka wan hangne kein, ka jing iakren ia kaei kaba la ujor sha ki thain Ri Bhoi, ba haba jot ki khlaw ki btap, ki parmaw par dieng, ba ka jingshah peit khmat ka dei ha ki nongsynshar shnong, ki nong synshar hima bad ka jingjia ha Lumshnong, ka dei ka nuksa kaba bha tam ba ngin shim.
Ka rai jong ka dorbar shnong Lumshnong ban khang ia ka bor jong ka Star Cement, ba kan tih mawshun, khlem pep, ka la dei ka rai kaba dakaid shibun eh, lehse, la kumba khang U Syiem Tirot Sing hyndai ia ka jingthombor U David Scott.
Lyngba katei ka rai, ngi iohi, ba ka shnong kaba ia tylli, ka lah ban jynrat ia ki buit poh jong ki briew kiba nabar, lada dei ka sorkar ne ki kompeni lane ki bar Jylla bad katei kan dei ka nuksa, kaba khraw shibun eh ba ia kiwei pat ki ishu, lada ki mynder ri, ki dukan bar Jylla bad kiwei kiwei, ba yn lah ban khynra, da ka jing ia tylli jong ka bor Shnong.
Ha kaba iadei bad ka kompeni mawshun ha Lumshnong, ngi iohi ba ka jing bakla, ka long ba la ailad ia ki kompeni ki bym hun shuh ban shna pisa bad ban pynjot ia ka mariang, lyngba ka jingkwah lum spah ba hakdak jongki bad ka sorkar Jylla, ka la dei ban nym ailad ba kaba kum katei ka jingthmu kan iaid shakhmat bad ka dei ban sngewthuh ba ka kompeni mawshun, ka wan hadien duh, ha kaba iadei bad ka koit ka khiah, ka bha ka miat jong u paidlang ka Lumshnong bad ka nuksa jong ka 19tarik, ka dei ban long ka jinghikai ba ka sorkar Jylla, kan phikir shwa ia la ki jong ki briew ban ia kiwei pat.
Phi don ban ong eiei?