“KA BOR JONG KA JINGDUWAI”

Dr. B.R. Marpna

Ka bor jong ka jingduwai ka long kawei ka atiar kaba rieh kaba ngi lah ban ialeh pyrshah ia ki bor jong ka jingdum, ki bor jong u bymman, ki bor kiba teh ba khum, ki bor jingpang jingkhrew, ki bor jingpynwit, ki bor ba pyntlot pynswai, ki bor sngewmeng bad sngewsarong bad kumta ter ter. Ha ka jingduwai ngi kjit ia kiei kiei kiba kynja mynsiem lyngba ka bor U Mynsiem Bakhuid Uba long U Nongpynshait bor namar ba U Mynsiem U ud hir hir ha ki jingduwai haba ngi iakren bad U Blei. Ha ka jingduwai ka wanrah ia ka jingsngewrit bad paw hakhmat jong U Blei kumba ngi long. U soitan u khynniuh haba ngi duwai bad u sheptieng ia ki briew kiba duwai. Iaroh ia U Trai!!!

Haba ngi phai na ka Ktien U Blei, ngi kynmaw kumno ba U Jisu U kren hadien ba U la pynkhiah ia uwei u khynnah uba pang bhur. “Hynrei u kynja une um ju mih noh hynrei tang da ka jingduwai bad kaba shah jingit” (Mathaios 17:21). Haba ngi duwai, ngi donkam ia ka jingngeit khnang ba ngin ioh pdiang ia kata ka jingduwai bad ka jingangnud jong ngi, khlem da artatien namar ba ngi pan ia kaei kaba long katkum ka mon jong U Blei. “Bad ia kiei kiei baroh kat kiba phin pan ha ka jingduwai da kaba ngeit phin pdiang” (Mathaios 21:22).

Ka long kaba donkam shikatdei eh ia ngi ban iaineh ha ka jingduwai (persistence in prayer) bad ban ym man thait kumba long kato ka Riewkynthei kaba U Jisu U kren ha ka pharshi haduh ba u Nongbishar u ai ia ka jingpan jong ka bad iai pan haduh ba kan da ioh ia ka jingkwah jong ka. U Jisu U kren bad iaipynkynmaw ia ngi haduh kane ka por kaba mynta ba ngi donkam ban iaineh ha U. “Lada phi iaineh ha nga, bad ki ktien jong nga ki iaineh ha phi, ia kaei kaei ruh ba phi mon, phin pan, te kan long ia phi” (Ioannis 15:7)

U Blei Un kyrkhu bad na ka bynta ka burom jong U. Amen.