Ka Bor Jong Ka Buit

Collin Wanñiang

Ngi la ju ïohsngew “Ka Buit ka long ka Bor”! Kaba dei shisha – u briew, watla u rit ne lyngkot ha la ka Longrynïeng, phewse u tei ïa ki Ïing paki dulan sha kynjoh bneng; u long kynrad halor ki Jynthaw baroh – dei tang namar ka Buit. Kumne, Ngin ïamir hangne halor ka Bor jong kane ka Buit.

U Plato u la thew sha kane ka Bor jong ka Buit haba u la ong “Ki Buit ki synshar pynïaid ïa ka Pyrthei”. – Dei ka Buit pyrkhat jong u Otto von Guericke (1650), u Benjamin Franklin (1752), u Thomas Alva Edison (1879), tt. kaba la pynlong ïa ka Pateng mynta ban ïohmad ïa u soh jong ka Bording Elektrik. Dei lyngba ka Buit jong u Alexander Graham Bell ba la wan ka Telephoun. Nangta, ha kane ka Juk jongngi la nang kham pynsuk shuh shuh ha ka Kyrwoh ïakren lyngba ka Jingwan jong ki Telephoun Mobail – Dei lyngba ka Buit jong u John F.Mitchell bad u Martin Cooper (1973) kaba la pynlong ïa ka Pateng mynta ban kheit ïa uta u soh jong kine ki Jait Phoun Mobail. Nangta, lada u Paid Khasi Hynñiewtrep baroh u ïoh ïa kat kane ka Kabu ban pule Kotkhubor ha la ka Ktien Khasi lajong, dei lyngba ka Buit pyrkhat jong u Thomas Jones bad ki Khrawpyrkhat jong ka Mynnor. – Ka Jinglumlang ïa u Paid Khasi baroh (Pnar, Khynriam, Bhoi, War, Maram, Lyngngam, tt.) lyngba ka Ktien pdeng “Sohra” ka la pynsyrdoh lang ïa ka Jaitbynriew kaba don la kijong kijong ki Ktien shnong Ktien thaiñ. Lada ka Ktien “Sohra” ba la pynbit pynbiang mynta da kaba lumlang ïa ki Ktien shnong Ktien thaiñ bapher ban pynpaw sha ka Pyrthei ïa kata ka Ktien “Khasi” kam shym la urlong, te haw ïapyrkhat ïa kata ka Apot sepsngi jong ka Jaitbynriew shitroh kaba ïapait ïapra ïashrut ïashrai namar ka Jingïapher Ktien shnong Ktien thaiñ! Shihajar Nguh ïa kita ki Khrawpyrkhat kiba la pyndonkam hok ïa la ka Buit pyrkhat ka jong ki.

Hateng hateng, ha ki Por ban tem ïa ki Huri Hura, ngi ïohsngew ïa kiba ong “Ym don Por ban pyrkhat…leh beit da ka Kam”! Haduh katno kane ka lambyrdei? Ha ka Jingshisha, kam lah ban long kumta namar watla ki ong “Ynnai pyrkhat…leh beit da ka Kam”, kata ka Kam ka don Tyllong ha ka Buit pyrkhat. – Kumba kata ka Huri Hura ka la sdang nyngkong eh ha ka Buit pyrkhat jong ki Briew bad ka sa pynseisoh ha ki Kam, kumta ruh dei ha ka Buit pyrkhat jong ki Briew ba ïa kata ka Suk ka Saiñ ka Palei ka Palung lah ban wanrah pat.

Haba khongoid sha ka Histori Baibyl ruh, ka pyni ïa kata ka Bor jong ka Buit. – Ka Buit pyrkhat thymmai jong ki Israel ka la pynbythat noh ïa ki na kiwei pat ki Jaitbynriew jong kata ka Por ha ka Thaiñ Asia Sepngi. Ki Riewshemphang ki kubur lang ba kita ki Israel ki la dei ka Jaitbynriew kaba rit bha. Ki la lah kumno re kumno ban seng ïa la kajong ka Hima ha ka Ri Kanaan, malu mala ha u snem 1000 SK. Kata ka Hima ka la phiah noh ha ki ar bynta ha u snem 922 SK. – Ka Hima bashatei ka kynthup ïa ki 10 Jaitbynriew, ïa kaba la khot kyllum “Israel”; bad ka Hima bashathie ka kynthup ïa ki 2 Jaitbynriew, ïa kaba la khot kyllum “Judah”. Ka Hima Israel (shatei) ka la shah dakhol bad shah ringmraw noh ha ki Assyrian ha u snem 722 SK. Hadien katto katne Snem, ka Hima Judah (shathie) ruh ka la shah dakhol bad shah ringmraw noh ha ki Babylonian ha u Snem 586 SK.

Kane ka Juk jongngi mynta, ka la myllen ha ka Jingsngewthuh ba U Blei U long halor kiei kiei baroh. Phewse, ha ka Mynnor hyndai, kano kano ka Jaitbynriew kaba shah ringmraw ka thew sha kata ka Jingtlotbor jong kita ki blei jong ki. Kumne, kita kiba shah ringmraw ki hap ban shah pynbor ban pdiang noh ïa uta u blei jong kita ki Nongjop. Kane ka mut ba ki Israel ki la hap ban ïashongkha khleh bad kita kiwei pat ki Jaitbynriew kiba la ringmraw ïa ki. Kumne, ki soh kiba mih nangta – ki Khun ki Kti kin ym dei shuh ki Israel paka; bad ka Pyrkhat Pyrdaiñ jong ki ruh kan ym long shuh Israel paka. Phewse, wat hapdeng kum kata ka Apot sepsngi, dei tang ka Buit pyrkhat thymmai kaba la pynlong ïa ka Jaitbynriew Israel ban khie-im biang bad ban ïai-im ha kata ka Por bad shirukom lah ban ong, haduh kine ki sngi ruh.

Kaei kata ka Buit pyrkhat pyrdaiñ thymmai?
Ki Jaitbynriew jong ka Asia Sepngi ha kata ka Por ki kheiñ ba ki Bor mariang baroh ki don ïa ka Bor Blei – ha ka shirukom, ki kheiñ ïa ki Bor mariang ba ki long blei hi. Ka Pyrthei ka long blei, ka Suiñbneng ka long blei, ka Um ka long blei. Ha ka shikyntien, ki Bor ka Mariang ki dei ki blei. Ki Israelite kiba la kha la im ha kum kata ka Sawdong Sawkun kim lah lait ban ïasam lang ïa kata kajuh ka Pyrkhat Pyrdaiñ, ka Jingleh Jingkam. Tangba, katba nang ïaid ki Por, katto katne na ki Israel ki la bythat noh na kane ka Pyrkhat Pyrdaiñ jong ka Sawdong Sawkun jong ki da kaba ki pynwanurlong noh ïa ka Buit pyrkhat thymmai – Uwei U Blei Uba long halor ki Bor ka Mariang bad Uba pynïaid ïa kiei kiei baroh. Ïa Une U Blei la tip lyngba ka Khanapateng, lyngba ki Jingïadei jong U bad u Paidbynriew. – Kane ka Pyrkhat Pyrdaiñ thymmai ba U Blei U long halor kiei kiei baroh, Uba don ka Bor halor ka Pateng bynriew, ka la pynlong ïa ki Israel ban batai thymmai wat ïa la kajong ka Jingshahringmraw bad ïa ka Jingshahpynjot ka Hima jong ki, ym kum kata ka Jingshahjop jong u blei ki Israel; hynrei kum kata ka Jingmang kyrpang kaba U Blei U la thmu na ka bynta jong ki. – Watla hakhmat ki briew la ikumba ym don Lawei shuh, phewse, kane ka Jingsngewthuh thymmai ka batai ba Uta U Blei Uba long Kynrad halor baroh, U la shah ïa ki Israel ban ïaid lyngba ka Them Jingïap ban poi sha ka Thong ba U la mang kyrpang ïa ki.

Kumne, ha ki Syrdeng jong kane ka Buit Pyrkhat Pyrdaiñ thymmai, ki Israel ki batai thymmai ïa ki Puriskam Purinam jong ka Sawdong Sawkun Asia Sepngi, ïa kiba ki Riewshemphang Baibyl ki kdew ha ka Kitab Jenesis 1–11:
• Ka Khana shaphang ka Jingthaw ïa ka Pyrthei (Jen. 1) ka shim nongrim na ka Purinam Babylon “Enuma Elish”.
• Ka Khana halor ki Shijur ha ka Kper Eden (Jen. 2–3) ka don Jingïasyriem bad ka Purinam Babylon-Assyria “Gilgamesh”.
• Ka Khana shaphang u Noah bad ka Jingshlei-um ka Pyrthei (Jen.6–9) ka don nongrim ha ki Purinam “Atrahasis”, “Gilgamesh” bad “Ziusudra”.

Ñiuma, ha ka Jaka ban shu peit palat tang ïa ki Jingïasyriem hapdeng ki Purinam jong ki Jaitbynriew ka Asia Sepngi Hyndai bad kijong ki Khun Israel, kaba kham donkam ka dei ban khmih ïa ki Jingïapher hapdeng jong ki. – ka Jingïapher kaba mih na ka Buit Pyrkhat Pyrdaiñ thymmai jong ki Israel kaba la pynlong ïa ki ban batai thymmai. Kum ka nuksa, ha ki Purinam Jingshlei-um Mesopotamia, ki blei ki la sngewthait ïa u Paidbynriew, kumta ki kwah ban pynjot noh ïa u. Katba ha ka Baibyl, U Blei Uba la thaw ïa u Paidbynriew katkum ka Hok ka Hukum, Um lah shah ban ïohi ïa ka Ryngkang Hukum lyngba ki Pop ki Sang jong u Paidbynriew. Kumne, ha ka Baibyl U Blei U ïeng halor ka Hok ka jong U haba U la pynshlei ïa ka Pyrthei.

Ha kane ka Jingsngewthuh bad Jingbatai thymmai, la mihpaw kata ka Bor jong kane ka Buit kaba la pynlong ïa ka Pateng mynta ban dang ïai pyrto ïa kita ki Khanapateng; bad napdeng katto katne ki Jaitbynriew hyndai jong ka Asia Sepngi, – ki Sumerian, ki Akkadian, ki Babylonian, ki Hittite, ki Phoenician, ki Hurrian, ki Canaanite, tt. – tang ka kyrteng “Israel” kaba dang ïai-kynoi ha ki tyndong shkor jong ki Pateng mynta (watla ym lah ban kubur ba ki Israel jong ka Mynta ki dei thik pa thik kita ki Israel jong ka Mynnor). Kumba ka Buit ka long ka Bor, ai ba ka Bor jong kane ka Buit kan synran ïa ka Jaitbynriew Khasi ruh.