Ka Bom ha Nongkrem, kti ha Sohiong, ia khyrwit u Sing bad ka Baje ha Laban

Shillong, 13 Nohprah:
U nongthohkhubor u la iaid tawiar ia kitei ki lai tylli ki konstitwensi ki ba ia khun ha kane ka elekshon MDC shiteng samoi ha KHADC. Ha katei ka jingiaid swait, u nongthohkhubor u la iohlum ia ka sur kyllum ba la iohsngew na ka sur ba ki paidbah ki pynsawa ha kitei ki konstitwensi.
Kat kum ka sur u paidbah la ong ba ha Nongkrem konstitwensi ka jingjhop kan leit sha ka Bom lane ka Party UDP ka ba la ia khun da u bah H.S Shylla, wat la ka la don ka jingiakhun bad ka seng HSPDP (Sing) ba ia khun da u ba Hubert Riang. Ki la don katto katne tylli ki jaka ba la khlain tyngeh da u kyrtong ka HSPDP kum ha Nongkrem, hynrei la don ruh katto katne tylli ki jaka ba la khlain tyngeh da u bah Shylla ka UDP. Ha Smit la iohsngew na ka sur u paidbah ba la ka kham noh sha u bah Shylla, ha Pomlakrai ruh ka sur u paidbah ka la noh sha u bah Shylla, nangta ha Umphyrnai ruh ka la noh sha utei u kyrtong ka UDP bud ter ter ha Umphrup-Liewlong bad ha katto katne tylli ki jaka ba kham bun vote.
Ha Sohiong konstitwensi ki la don katto katne tylli ki jaka kum ka Umsaw ba u Sing u la sawa jur , ki la don ruh ki jaka ba ka kti bad ka bom ki sawa jur , ha Lawmei, Jabar ka kti ka la sawa jur ,ha Krang u Sing bad ka kti ki la sawa jur, hynrei haba shim jingkhein kyllum ha katei ka konstitwensi la sngewthuh na ka sur u paidbah ba ka kti ne ka seng Congress kan ioh ia ka jingjop katba ka ba-ar bad kaba lai pat kan long ka jingiakhun ba ia khaid bha hapdeng u Sing bad ka Bom.
Ha Laban-Mawprem ym lah ban sngewthuh shai shano ka jingjop jingrem jingrem kan leit hynrei la ong ba ka jingiakhun ha katei ka konstitwensi ka long kaba ia khaid bha hapdeng ka seng NCP ( Baje) bad ka seng HSPDP (Sing).
Ki la don katto katne ki konstitwensi kiba ka baje ka trei bad katto katne pat kiba u Sing u trei hynrei haba sngap kyllum na ka sur u paidbah la sngewthuh ba lada ka jingjop kan leit shano shano ruh kan shu ia tam tam kai, mar khyndiat khynsoit, la sngewthuh ruh ba ka jingjop hangtei ka lah ban leit sha ka seng NCP ne ka Baje kaba la don lypa u MLA ba mynta u bah Sanbor Shullai.