Ka BJP na kyrpong, ba iatreilang ka UDP-HSPDP: Mukul

Shillong, 04 Jylliew:
Ka jingiateh paralok ki ar tylli ki seng riewlum ka jylla kynthup ka United Democratic Party (UDP) bad ka Hills State People Democratic Party (HSPDP) shwa kane ka elekshon ban wan, ka la buh ka jingartatien ia ka Congress ba ka lah ban dei tang ka jingplie lad ia ka BJP ban ioh bsuh khlieh na kyrpong iing.
U Myntri Rangbah ka jylla u Dr Mukul Sangma, u la ong ba ka jingiatreilang ki seng riewlum kam dei shuh kaba rim namar ba ka ju don teng ruh kum kane ha ki snem ba la dep hynrei mynta ka daw ka jingiatreilang jongki ka dei tang namar ba kim lah ban pyni beit ia ka jingiatreilang bad ka BJP ha ka elekshon.
“Hato ka jingiateh paralok ka UDP-HSPDP kan long kum ka jingplie lad ia ka BJP ban bsuh khlieh na kyrpong iing ha kane ka jylla”, la ong u Dr Mukul.
U la ong ba ka jingiateh kine ki seng riewlum ka long kumba ai lad ia ka BJP ban wan bsuh khlieh ha ki jylla ka Dong Mihngi namar ba baroh kine ki seng riewlum ki don ha ka shatri ka North East Democratic Alliance (NEDA) kaba ialam da ka BJP.