Ka BJP kan nym khang doh masi, ong u General Secy

Shillong, 22 Iaiong:  
Wat la u President rangbahduh ka Bhartiya Janata Party (BJP) u Amit Shah um kren eiei sha ki nongthoh khubor, hynrei na ka liang u general secretary ka party u Ram Madhav uba wan lang mynta ka sngi bad u president, u la ong ba ka seng, kan nym khang ia ka bam doh masi ha kane ka thain dong mihngi ka India.
Haba kren sha ki nongthoh khubor u  Madhav ha kane ka sngi Balang,  u la ong ba ka BJP kan pynthikna ba ka jingshngain jong ki paidbah na kane ka dong mihngi bad khlem shah niam ne khlem kano kano ka jingsngew pher niam ha ka ri.
“Ngim shym la tyrwa ne phah ban khang doh masi hangne”, la ong u Madhav.
U Madhav u la ong ba ki katto katne ki jylla, ka la don ka jingkhang bam doh masi la slem bha, watla um shym la jer ia kita ki jylla.
U la ong ba ka jingkhang bam doh masi ha ki katto katne ki jylla kum ha Maharashtra la leh namar ka daw ba iadei bad ka ioh ka kot bad ka sorkar BJP ha ki jylla, kan bishar ia kane shwa ban shim ia ka rai.
Ka jingwan iuhkjat u president ka BJP u Amit Shah ha kane ka jylla la sakhi ia ka jingkhang shnong ka HNLC bad ka jingpyrshah jong ki kynhun ban pynpaw pyrshah ia ka jingthmu bam doh masi bad ka jinghiar thma ia ki iingmane ki Khristan.
Hynrei na ka liang u Madhav u la ong ha ka ri synshar paidbah, ki lah ban pyrshah tangba ka jingpyrshah jongki, ka dei ka bym shisha.
U Madhav u la ong ba ka jingpyrshah kam long kaba shisha namar ba ka BJP ka kut jingmut ban wanrah ia ka jingiatylli jong ka ri khlem kano kano ka jingsngew niam. “Ka India ka dei ka ri kaba don ki jait niam bad baroh ki niam kin im ha ka jinglait luid bad ka jingshngain bad ka BJP kan pynthikna ia kane”, u la ong.
U la ong ba ka sorkar BJP ka la shim ia ki lad ki lynti na ka bynta ban kyntiew ia kane ka dong mihngi ban pynkhlain ia ka ioh ka kot bad ka roi ka par kaba sted.