Ka BJP kam lah ban wanrah ka polisi ha Arunachal: Joshi

Shillong, 05 Naitung:
U nongpeit ka AICC ia ka Meghalaya u CP Joshi u la kop pia da kaba ong ba ka BJP kan nym lah ban wanrah da ka buit polisi na jylla Arunachal Pradesh ha Meghalaya ban pynkhyllem ia ka sorkar Congress.
Ha ka jingkren sha ki nongthoh khubor mynta ka sngi, u Joshi u la ong ba ka BJP ka la pyrshang katba lah ban pynkhyllem ia ka sorkar Congress ha kane ka jylla Meghalaya hynrei ka buit jongka, kan nym urlong satia.
“Ka BJP kan nym lah ban pyntreikam da ka buit kumba leh ha jylla Arunachal Pradesh hangne ha jylla Meghalaya”, la ong kren u Joshi uba kyntait ruh ba ki MLA ka Congress kin leh kumba jia ha katei ka jylla.
“Kim lah ban leh biang hangne ha Megha laya kumba leh ha Arunachal Pradesh”, la bynrap biang u Joshi. Kane ka jingkren jong u Joshi ka long hadien ba ka sorkar Congress ha jylla Arunachal Pradesh ka la shah pynkhyllem ha ka BJP da kaba pynpait pynpra phom ia ka Congress ha katei ka jylla.
U la ong ba ka BJP ka la iaksaid tyngeh ban ioh iuh kjat hangne ha thain dong mihngi ka ri India da kaba shu iasnoh bad ki seng trai ri jong ki jylla.
“Ki (BJP) ki shu thaw lad ban iateh bad ki seng trai ri jong ki jylla hynrei kane kan nym urlong namar ba ki paidbah ki tip bha ia ki kam jongka”,  u la ong.
U la ong ba ha kane ka jingialang u la ioh ia ka jingpynshai ia ki jingeh kum ka jingkhang dewiong ka NGT hynrei kane ka kam ka dei bad ka ain jong ka sorkar pdeng ban pynbeit ia ka bad kiwei ki kam ba iadei bad ka jingtreikam ka party.