Ka BJP kam don bynta eiei bad ka RSS, ong u President

Shillong, 17 ’lyngkot:
U president ka BJP Meghalaya u Bah shibun Lyngdoh u la kyntait ia ka jingkynnoh u Zenith M Sangma ba ka BJP ka iadon bynta bad ka RSS ha kane ka jylla. Haba kren mynta ka sngi, sha ki nongthoh khubor, u Bah Shibun u la ong ba ka jingkren jong u Zenith ka dei tang ka ktien politik suda bad kam don jingeh ia ka BJP ban kynnoh kylla ia ka Congress kum ka nongkhring ia ki mynder ban wan rung ban ioh vote.
“Lada ki kynnoh ba ka BJP ka don bynta bad ka RSS, ka don jingeh aiu ia ngi ruh ban ong ba ka Congress ka dei ka nongwanrah ia ki mynder tang ban ioh vote”,la ong u Bah Shibun. Hynnin ka sngi, u myntri kam ialehkai ka jylla u Zenith Sangma u la kynnoh ba ka BJP ka don jingiadei bad ka RSS.
“Ka BJP bad ka seng RSS ki long la ka jong, kam don jingiadei ei ei, ka BJP ka dei ka seng sain pyrthei katba ka RSS ka dei tang ka seng treimon sngewbha”, la ong u Bah Shibun. Katba u Vice president ka BJP u Gagan Jain u la ong ba u Zenith Sangma u la dei ban da bishar bniah shuwa ban kren ia kum kine kiei kiei baroh. “Lada ka Congress ka ong ba RSS ka trei shitom na ka bynta ka BJP, kin sngew kumno lada ong ba ka Congress ka pyndon ia kam ia ki mynder ban long ka vote bank jong ki”,u la ong.