Ka BJP, kam dei ka parti ba ibein Khristan, ong Bah Khakrang

Shillong:U Bah Mariahom Kharkrang, u ba dei u nongkren jong ka parti BJP ha ka jylla, ha kajuh ka por ruh kum u wei na ki nong pan tiket na ka parti BJP, ban iakhun ia ka elekshon MLA na 17 North Shillong constituency, haba iakren bad ki nongthoh khubor u la ong ba ka parti BJP hi kam dei kata ka parti ka ba ibeiñ ia ki kristan ne kaba khang ban bam doh masi ha ka ri, namar ba kumba long mynta kim da iohi ia kum kita ki jingkynnoh. Kiba kum kine ki jing kynnoh ki dei beit ki jingthmu jong ki parti ba don ha ka liang pyrshah, ban ialam bakla bad pynsngewthuh bakla ia ki paidbah jong ka ri hi baroh kawei, na bynta ka jing ioh nong saiñ hima sima jong kito ki parti.

Haba ai jingkren ha ka jingpynrung dkhot thymmai jong ka parti, kum shibynta ban pynkhlaiñ ia ka parti ha ka elekshon ban wan, u bah Kharkrang u la ong ba ka parti BJP jong ka 17- North Shillong Mandal, ka la pynlong ia ka jing pynrung dkhot thymmai sha ka parti ne kata ka (enrollment drive) ia kito ki ba rung sha ka parti ha ki lai tylli ki jaka, ha ki taiew ba dang shu dep ki la pynlong ia ka jing pynrung dkhot ha Police bazar, ha Jail road bad ha Riatsamthiah, ha kaba da ki spah ngut ki paidbah ki la wan shim bynta shitrhem ban long ki dkhot ba pura jong ka parti BJP, na bynta ka roi ka par jong ka jylla bad ka konstitwensi hi baroh kawei.

Tang mynhynnin ka sngi ha ka enrollment drive jong ka parti BJP ha Riatsamthiah, da ki spah ngut ki paidbah ki la poi lang ban ia shim bynta. Kumba long mynta na ki lai tylli ki enrollment drive kiba ka mandal ka la dep ban pynlong da ki hajar ngut ki paidbah ki la wan, la ong u ne u nongialam.

U la ong ruh ba ki paidbah jong ka jylla kim dei shuh ban tieng ia ki jing pyntieng koh-tympan jong kiwei pat ki parti ba ka parti bjp kan khang ïingmane, kan khang bam doh masi, hynrei lada ki kwah shisha ia ka jing kylla bad ka roi ka par ha ka jylla Meghalaya, ka parti BJP, ka dei tang ma ka na ki parti kaba la leh shibun ki kam ba iadei bad ka roi ka par ha ki jylla kiba ka la bat ia u lakam synshar bad wat ha ka ri ruh kumjuh,la ong u bah Kharkrang.

Haba kren shaphang ka jingeh jong ki samla haba iadei bad ka ioh kam ioh jam ha ka jylla, u ne u ophisar ba la shongthait u la ong ba ka sorkar pdeng ba ialam da ka parti BJP, hi ka pynmih ia bun tylli ki skhim kum ka mudra ka ban iarap pisa ia ki khun samla na bynta ka jingtrei ka jong ki ha kino kino ki kam ba ki trei,ba ka kin bit kin biang ha ka kamai bad kin ioh lem ruh ban sengkam lajong na bynta ka lawei ka jong ki. U la ong ruh ba ki khun samla jong ka juk ba mynta ha ka jing shisha ki dei ban long ki samla ki ban lah ban ai kam ai jam ia kiwei namar ba ki bun bha ki jingiarap pisa kiba la bei da ka sorkar kum ka ram, ha ka sut ba rit na bynta ban plie lad plie lynti lem ia ki khun samla ba kin ioh ka kamai ba biang na bynta ka lawei ka jong ki.