Jowai, 11 Nohprah:
Ha ka jingialap Election kaba khadduh ha kane ka sngi Saitjain, ki nongialam ka Party UDP bad ki nongkyrshan ba hakhmat eh u Independent Candidate ki la ia kyrwit markylliang halor kiba bun ki issue ha kaba iadei bad ka bye election kaba ha War East Constituency sha ka iing dorbar ka sorkar rit JHADC.
Ha kane ka sngi Saitjain, ki ar ngut ki kyrtong u ma Firstborn Manner na ka UDP bad u ma Lotsingh Lakuna u kyrtong Shimet ki la pynlong ia ka jingialang paidbah ha Muktapur kaba dei ruh ka sngi iew.
Ha ka por mynstep, ka party UDP ka la pynlong ia ka jingialang paidbah ha kaba ki nongialam ki jong ka seng naduh u Working President uba dei ruh u nongaibuit, u ma Bindo M Lanong, u President ka District u ma Moonlight Pariat MDC bad kiwei kiwei ki nongkyrshan ba paw khmat ki la pynpaw ia la ka nongrim jong ka Party halor kane ka Election shiteng samoi bad kumjuh ruh na ka bynta ka Election MLA ka ban sa long ha u snem 2018.
U ma Moonlight Pariat, President ka Party UDP, Jaintia Hills District u la kynthoh tyngeh ia u MLA ka thain u ma Stephanson Mukhim uba la thung ia u kyrtong IND, u ma Lotsingh Lakuna hadien ba u la iehnoh kam ialade kum u MDC ka thain.
Une u MLA jong phi u dei u bym tip ia ka ain ka kanun bad dei namar katta u la iehnoh kam, namar ka ain ka shah ban bat ia ka kam MLA bad MDC ha kajuh ka por. Hynrei namar ba udei u briew ubym sngewthuh ia ka ain, u la iehnoh kam bad ka jingiehnoh kam jong u ka la wanrah ia ka jingduhnong ia ka Constituency ha kine ki khyndiat por.
U ma Moonlight Pariat u la ong ruh ba ka Party UDP kadei ka Party riewlum bad kadei ka party kaba peit ia ka eh ka shnon jong ki paidbah nongshong shnong ym ban iada ia kiwei pat ki jaitbynriew kiba wan ban huhai shnong ha kane ka jylla.
U la kynthoh tyngeh ruh halor ka jingsngap jar jar u MLA ka thain halor ka Border Fencing.
Na ka liang u ma Bindo M Lanong, uba dei u MLA ka UDP bad ruh u Working President ka seng u la kynthoh tyngeh halor ka jingsynshar bymler kam ka Congress. U la ong ba ka seng ha ryngkat ka jingiatreilang bad ka kynhun nongialam ban pyrshah iaka border fencing haduh 150 yard kaba ktah shi katdei eh ym tang ia ki paidbah ka jylla hynrei kaba buh jingma ruh ia ka ri baroh kawei. “Ngi na ka liang ka UDP, ngim nym ailad ban duh wat tang shi inshi ruh ka jaka khappud sha Bangladesh bad ngi ieng ha ka nongrim ban dawa ba dei ban ker sainar shiah naduh na Zero Line”, la ong u bah Bindo M Lanong.
Ha kaba iadei bad ka seng BJP, u ma Bindo u la ong ba kadei ka seng kaba kwah ban pynlong niam hindu lut ia baroh nalor ka jingkhang jong ka ban bam doh masi. U la kyntu bad kyrpad ia ki paidbah jong ka thain ba kin kyrshan ia u kyrtong ba la pynieng ka seng- u ma Firstborn Manner.
Ha kawei pat ka Dorbar paidbah kaba la pynlong da u kyrtong shimet (IND), u ma Lotsingh Lakuna ha ryngkat u MLA ka thain, u ma Stephanson Mukhim, la ioh ban sakhi da bun bah ki paidbah kiba la wan da ki bun tylli ki bus bad ki kali rit. Haba kren ha ka jingialang, u ma Stephanson Mukhim kum u MLA ka thain, u la pynshai paidbah halor ka jingiehnoh kam jong u kum u MDC hadien ba ka sorkar jylla ka la shim ia ka rai ban mynjur ia ka ain bam ar maloi.
“Kadei ka rai jong ka sorkar ym dei ka mon jong nga marwei bad ki jingkynnoh bad kynthoh ia nga da ki nongialam ka UDP ka long kaba ym don nongrim satia.Ha kaba iadei bad ka border fencing, u ma Mukhim u la ong ba ka sorkar India ka la dep lut ban ker sainar shiah sha West Khasi Hills, Garo Hills bad wat ha Jaintia Hills lait noh ka bynta naduh Lyngkhat shaduh Jaliakhola ha kaba kum u MLA u la kyrpad ia ka sorkar ba kan sangeh shwa tad haduh ban poi sha ka jingiabeit bad ia sngewthuh jingmut hadpeng ki paidbah nongshong shnong bad ki tnad sorkar ka sorkar Kmie kaba pyntreikam ia ka jingker sainar shiah.
Na ka liang u tei u MLA ka thain, u la kyrpad ia ki paidbah ban kyrshan ia u ma Lotsing Lakuna namar udei u briew uba lah ban wanrah ia ka roi ka par ha ka thain da ka jingiatreilang ryngkat bad u kum u MLA bad ruh ryngkat ki paidbah nongshong shnong.
Ha kawei pat ka khubor, la sngewthuh ba ka jingiakhun kaba tyngeh kadei hapdeng u kyrtong shimet ba kyrshan da u MLA ka thain bad u kyrtong jong ka Congress, u ma Lamdibok Sumer uba ju long ruh kum u CEM barim ka JHADC.
Ka jingiathep vote kan long ha ka 13 tarik (Sngi ba-ar) bad ka jingniew ia ki vote kan long ha ka 16 tarik ha ophis ka SDO Amlarem Civil Sub-division.
Phi don ban ong eiei?