“Ka BJP, ka dei ban sngewnguh ba ngi la kynthup ia ki ha ka MDA”

Shillong:Shisngi hadien ba U bah Sanbor Shullai, ula kynthoh bad ki seng sain pyrthei, kim lah satia ban iakhlad bad ka BJP, hynrei mynta ka sngi, U Dr WR Kharlukhi, nongialam ka seng BJP, ula ong ba ka seng BJP, ka dei ban sngewnguh, ia ka BJP, namar ba la ai bynta lem ia ki, ba kin don ha kane ka sorkar synrop MDA.
“Ka BJP, ka dei ban sngewnguh ha ka jingshisha, namar ba ka dei ka jingsngew synei jong ka NPP, ba la pynrung lem ia ki ha ka sorkar MDA” ong U Dr Kharlukhi mynta ka sngi.
Hynnin ka sngi, U bah Sanbor Shullai, ula ong ba ha ka por elekshon, kiba bun ki seng sain pyrthei, ki kynnoh ia ka BJP, hynrei mar ia wai, baroh ki la ia ieid ia thoin bad U bah Sanbor, u ong shuh shuh ba ki seng sain pyrthei, ki donkam ia ka BJP, na ka bynta ban ioh pisa kham bun na Delhi.
Na ka liang U Dr Kharlukhi, u ong shuh “Kat kaba dei ka pisa jong ka sorkar Jylla, ka dei ka kamram jong ka sorkar India, ba kan pyllait bad u paidlang ka jylla, u ju siew da ki khajna bapher”. Halor ka jingbuh kandidet pat jong ka BJP na Shillong bad na Tura, U Dr Kharlukhi, ula ong ba ka jingiatreilang ha ka MDA, ka dei kaba hadien ka elekshon bad kam dei satia kaba ha shwa ka elekshon.