Ka BJP ha Meghalaya ka dei ban pynshai shuwa ialade la ka kyrshan ne ka pyrshah ia ka CAA: CoMSO

Shillong: Halor ka jingmih khubor ia ka jing thmu jong ka Party BJP jong ka jylla Meghalaya ba ka kwah ban leit pynshai paidbah ban kyrshan ia ka CAA na ka liang u Chairman ka COMSO u bah Robertjune Kharjahrin, u la ong ba ka party BJP ha Meghalaya ka long ka party kaba kulmar jingmut namar ki MLA ka BJP shiphang ki la ong ba ki pyrshah ia ka CAA bad ki kwah ia ka ILP ha ka Jylla hynrei ha ka wei ka liang pat ki ong ba ki kwah ban leit pynshai paidbah ban kyrshan ia ka CAA kane ka pynpaw ba ki ialade ruh kim pat shai la kin pyrshah ia ka CAA ne kin kyrshan ia ka CAA ruh kim sngewthuh.

U la ong ruh ba ka jingthmu jong ki ba kin leit pyrshai ia ki paidbah ban kyrshan CAA kan ym trei kam namar ia lade ruh kim pat shai kumno kin leit pynshai ia ki paidbah.

Na ka liang jong ngi,ngi kyntu ia ki ba kin pynshai shuwa ia lade ba ki kyrshan ne ki pyrshah ia ka CAA namar ba ka dei ka party ka ba shubud ia ka hukum jong ki nongpyniaid jong ki.