Shillong:U MLA ka BJP na jylla Goa, u Nilesh Cabral uba dei ruh u myntri sorkar, u la ong ba ka jingkynnoh ba ka BJP ka pyrshah ia ki Khristan ka dei tang ka jinglamler. U Cabral uba dei ruh u Khristan na jylla Gao, u la ong, “Palat 70 percent ki nongshong shnong ha Meghalaya ki dei ki Khristan bad kumjuh ha Goa; ngi don ki Khristan ha Goa, nga ruh nga dei u Khristan, nga dei na Balang Katholik. Ia ka Goa la synshar ka BJP wat ha ka jylla kaba bun tam ki nongshong shnong ki dei ki Khristan, bad kane ka pyni ba ka jingkynnoh ba ka BJP ka pyrshah Khristan ka la pynshisha ba ka long kaba bakla”.
U Cabral u la kren ia kane ha ka jingrakhe ia ka ‘jingiateh jong ki lariti bad ki tynrai’ kaba la pynlong ka BJP Meghalaya ha ophis ka parti ha Shillong, mynhynnin ka sngi ban rakhe ia ka jingioh jylla ka Goa hapoh ka lama ka Ek Bharat Shreshtha Bharat.
La don lang ruh u Sunil Deodhar, uba dei u National General Secretary ka BJP ba peit ia ka North East jong kane ka Ek Bharat Shrestha Bharat Programme, u President ka BJP u bah Ernest Mawrie nalor kiwei.
Ha kajuh ka por haba kren halor ka Uniform Civil Code (UCC), u Cabral u la ong ba ki paidbah ki don ki jingmutdur bapher bapher ia ka UCC, hynrei kiba bun kim dei kumba kila mutdur. “Ka UCC ka thmu ban pynbeit ia ka shongkha shongman bad ka jingiaphet lok, ban pynthikna ia ka jingiasam marbiang ia ka spah hapdeng u lok bad ka lok”, la ong u Cabral.
Haba kdew ia ka Goa civil code, u Cabral u la ong ba ka Goa ka la pyniakhlad na India namar ka jingsynshar donbor ki phareng ha ki por jong ki Portuguese Goa bad Damaon; ka la kylla long ka Union territory, lem bad ka Daman bad Diu Islands, ha u 1967 bad ha u Jymmang 30 tarik, 1987, ka Union territory ka la pra bad ka Goa ka la ioh noh ia ka jylla ba pura ba 25 ha ka ri, katba ka Daman bad Diu ki iai sah kum ki Union territory.
Bad haduh mynta, dei tang ka Goa kaba don la kajong ka Goa civil code khlem da khein ia kano kano ka jait niam, ka jaitbynriew.
U la ong ba ka UCC ka dei ka jingthmu ban pynwandur na bynta ban pyntreikam ia ka Personal Laws (ain shimet) jong ki nongshong shnong kaba treikam ia baroh ki nongshong shnong khlem khein na kano kano ka jait niam, ne kano kano ka jaitbynriew, hynrei kan iaryngkat baroh.
U la ong ba u sngew kmen ban don ha ka ri India kaba pdiang ia baroh ki jait niam, ki jaitbynriew bad kam don kawei ruh ka ri ha ka pyrthei kaba long kum ka India ban don bun jait ki jaitbynriew. U la ong ba ka Ek Bharat Shrestha Bharat Programme ka dei ka jingrakhe ia ka jinglong kawei hapdeng bun jait ki jaitbynriew ha ka ri, ban kyntiew ia ka jingialong shipara.
“Ka India ka dei ka ri kaba kiew sted bha ha ka pyrthei. Ka thma Ukraine ka la ktah ia ka ioh ka kot jong kiwei ki ri hynrei kam lei lei ia ka India bad kane ka dei namar ba ka polisi ka ioh ka kot jong u Myntri Rangbahduh ka ri. Ka India ka la kiew bha ha ka ioh ka kot, bad lada baroh ki jylla ha ka ri ki kyrshan kawei ia kawei pat, ha ki 25 snem ban wan, ngim ym donkam shuh ban siew T.70 lane 80 na bynta shi US dollar,” u la bynrap.
Phi don ban ong eiei?