“KA BIH SEINIONG HA KA RI BAD KA JAITBYNRIEW”

Rev.B.P.Pohsngap

Da ka mynsiem kaba sngewkhia eh nga duwai bad shim ia u khulom ban thoh ban kren ia kane ka khubor, ka bih seiniong ha ka ri bad ka jaitbynriew jong ngi. Da kaba sngew burom ia kito kiba niew donkam eh ban pyndonkam ia ka, ha kano kano ka kam, to ka shong ha ka jingngeit bad ka jingsngewthuh jong ki hi.

Na ka ktien U Blei ngi shem ba u soitan u kylla bsein bad u bsein u kylla soitan. Ka kitab Jenesis 3:4 ka ong, “Te uta u bsein u la ong ha kata ka briew, phin nym iap noh shisha”. Na kaba kohnguh ia u bsein ka pop ka la rung ha ka pyrthei. Ka Proberb u Solomon U Syiem Israel, u kren maham ia kaba dih wain ne dih kyiad Prob 31:45, “ Kam dei ia ki syiem, ko Lemuel , kam dei ia ki syiem ban dih wain, lymne ia ki myntri syiem ban ong, Hangno ka kyiad? Ioh haba ki dih ki klet ia ka ain bad pynbakla ia ka jingbishar….” Ia ka wain ia ka kyiad ym dei tang ki syiem ki myntri ki heh ki hain lada ki dih ia kano kano ka ain kin nym sngewthuh shuh hi, bad kin bakla ha kino kino ki kam baroh, la ki sngew ba ki biang hynrei la lait lut hi baroh, namar U Blei Um sngewbha ia ki.

Tang ban ia tip khyndiat la ka lah ban ia pher na ka jingtip kaba bun na kiwei. Kaei bad kumno ka kylla bih sein iong kaba lah shisha ban pynlehrain ban pynjot, ban pynpra khiew ja, khiew jhur ban pynklet wat ia ki ain ki kanun ba la ia teh ia spain la ka long kha long man, bad ka pyniap briew barabor wat ki kali ba bun jait, don kiba da ka Bus ruh barabor ki hap sha riat da ki spah ki briew ki mynsaw bad ki iap ruh. Ah ka Ri ka Jaitbynriew jong ngi. Ka bih sein iong ka tuid ha man la ki shnong, mynta lei lei la da pynbna da ki bor ba ha khlieh ba yn leit ai pynbiang (supply) sha kito kiba donkam “Wow! Wow! Kan kylla “Woe – Woe” – kordit kordit.
Kumno ka long “kyiad” ba bang ki briew ban dih? Kumno ka long bih sein iong haba la dih? La shna kyiad da ki jait jingbam ba bha eh ba la ai U Blei ha ki briew. Don lai jait ngan batai khyndiat ia kane ka phang :-

1. (i)Kyiad (wine) : ka dei ka jingdih, kumba ju ong kiba bam kiba dih, ha ka jingshisha , ka ja ka jhur, ka sha ruh ka hap ha ka bam ka dih, hynrei haba iakren ia ka jinglong briew khamtam ha ka por long kha long man, ki kmie ki kpa ki ju ong, to yn leh kumno tang uba lait na ka dih ka bam (kyiad) (ii) ka um kaba mih na ka jynhaw ba shet khleh bad u thiat.
2. U Thiat (yeast) : u dei u jait khynbat ba pyndonkam haba shet kyiad. U dei u jingthung uba mih sha khlaw, ki briew ki leit kheit bad die sha iew da kaba iakut bad kito kiba shet kyiad. Tang kiba shet kyiad ba thied ia uto u jingthung. Ynda ki la dep thad pyn rkhiang bha, ki sa dung pynlwet bad khleh lang ha ka jyndem ba la dep shet ih na uno u jingbam, u krai ne u khaw ne ki soh ba bun jait, ki khleh da u thiat bad ki shet ha ka ding, u khiew shet ba la khreh bha tang ban shet kyiad. Nga la iohi da lade por ba dang khynnah ba don ki kha ha Padu ba shet kyiad. Na u khiew ba la thnam bha ka tdem ka pynmih jynhaw bad ka jynhaw ka mih ka um sngur khuid bha na u tyndong bad jaw ha ki klong ba la buh bha. La iathuh khana kiba tip (ym manga) ki Nongshet haba shet, ki kren ki ktien kumba kyrpad ba ka kyiad kan bha ba kiba dih kin buaid bha da kata ka bor ban mih na ka um kyiad ban shoh bieit ia ki briew.
3. Kian (a Charm or a Magic) : Ka mut ka bor pynshoh bieit, ka bor Maian jadu, kumba leh byrtong. Ha kane ka kyiad ka don kata ka “kian”, ka bor pynbieit ia ki nongdih, ba kin sngew sarong sngewkhraw ba kat ma ki ym don shuh ha pyrthei, haba ki iaid ha surok, ki byrngem byrsit, ki kren sih kren sarong namar ym dei shuh ma ki ba leh hynrei kata ka bor “kian” kaba pynlong ia ki kumta, kumba ka pang, ka shitom , ka sniew ki dkhot met jong ki, kumta ruh ka pynjot pynpra pynkhlad shi lok shi tnga. Don kawei ka bor jong ka “kian” kaba pynshoh bieit ia ki thei samla bym pyrkhat ia ka lawei, ka jingiaid lynti ha ka longing long sem hadien wat haba la don da ki san ngut ne hynriew ngut ki khun, ynda lah samla ki khun ha ka bym lah shah ki beh noh sha ing kur namar kim lah shuh ban shah, ynda haba la mih noh u buaid na iing, ka iing ka suk ka sain jai jai, ngi la iohi ia bun kiba kum kita ki jia namar ka khambha kata ban ia ka ban ia shoh ia dat ha iing ha sem. Ngin ia phai na ka ktien U Blei kumno ka kren ia kane ka nongpynjot kaba shyrkhei ka Bih Sein iong:-

I. Donkam ban pynduh noh ia kane “KA BIH SEINIONG” naba ka don ka jingma : Ha ka por hyndai ki khun Israel haba don u briew uba la ngam ha ka “buaid”, uba kata ka bor ka “kian” pynjot kaba ka iing kam lah shuh ban Synshar ia U, ki la ai ha ki tymmen ki san ka nongbah haba um kohnguh, ki lynthem maw ia u haduh ban da iap. Ka kitab Deuteronomi 21:20, “Kin lynthem maw ia u ban un iap, kumta kin pynduh noh ia kaba sniew napdeng jong ki bad ki Israel kin ioh sngew baroh bad kin sheptieng”. Ha ngi mynta ngi dei ban ia ieng rangbah ban pynduh noh ia ka “Kyiad” ban pynim ia ki briew. Kaba ai lad ban Pynroi ia ka “Kyiad” ka dei kaba phi ai lad ia ka jingsniew ba bun jait baroh. Ka Proberb U Solomon 31:4, ka ong, “Kam dei ia ki syiem ki myntri ban dih kyiad (wine) bad kim dei ban ong hangno ka kyiad? “ Prob 23:21, ka ong , “Naba uba buaid bad uba bam lalot kin poi sha ka jingduk bad kaba sam thiah kan pynkup ia u briew da ki jain jot”. Ka dkhot 29- 32 ka iathuh ia ka jingma jong ka, “kin don ka jingkordit, ka jingsngewsih, ka jingiapyneh, ka jingud, ka jingmong khlem daw, ka jingsaw ki khmat, bad haba kaba kut ka dait kum u ‘sein iong”.

Ki riewkhraw nongiathuhlypa U Blei ki la maham ki la kren jur ia “ka Kyiad” ka nongshun kaba khraw tam jong ki bynriew ha ka pyrthei. Isa 5:11 u ong , “Kiba ia beh ia ka kyiad kin kordit”. Isa 28:1, “Kin kordit, ka pansngiat ka burom , ka jingitynnad jong ki, kan jlop, katba ki dang im ki ieng ha khlieh ka them kaba sngaid (Fat valley) kiba la jop da “ka kyiad” (wine). U Nongiathuhlypa Nahum 1:10 u ong, “Yn thang duh ia ki kum U Lang tyrkhong”.
Ym tang ki nongiathuhlypa ba kren ba maham ia kane “Ka kyiad”, Bih sein iong, U Jisu U kren U maham, U Apostol Paul u kyntu u khot ban kiar na kane ka nongpynjot kaba shyrkhei, kaban khanglad ia u briew ban leit sha ka hima U Blei 1 Kor 6:10, “kiba buaid kin nym ioh kein ia ka hima U Blei”.
Ko ki lok ki jor Kynthei bad shynrang to ngin sumar ialade marwei marwei ban iarap pynkynmaw ia kito kiba ieit ia ka BIH SEIN IONG, ban kylla kabamut katba ka por ka dang biang, U Blei U ieit ia ka mynsiem jong phi, phai sha U, pdiang ia U, ba phin ioh ia ka jingsuk bad jingpynim. To U Blei Un kyrkhu ia kane ka khubor na ka bynta ka burom jong U hi .. AMEN……….