Ka bhah ki nong bishar jong ki kashari District Council, sha ki kyrdan nongbishar ha high court

Kumba ka long baroh shikatta ki Nongbishar ha ka High Court Meghalaya ki dang duna. Lada ym bakla don tang uwei u nongbishar ba ha khlieh (Chief Justice) bad sa uwei u Nongbishar (Justice), kaba mut ki don tang arngut. Ka jingdon tang arngut ki Nongbishar ha High Court, lehse, kan buh jingeh ia ki mamla (litigant) ki bym hun ia ka jingrai jong uno uno u Nongbishar marwei (single Bench Judge), namarba ym don lad ban apil (appeal) sha ka Kashari ba kham halor (Division Bench) kaba kynthup ia ki arngut ki Nongbishar. Kita ki Nongbishar arngut ki dei ki bym shym don bynta ha kaba shym bishar ia ka kam (case) ba mut ban apil. Ia kane ka Kashari ba kham halor (Division Bench) dei ban thaw mardor (constitute immediately) haba la donkam, khnang, ba ki mala kin ym duh nong bad slem por. Hynrei, kumba ka long mynta ba don tang arngut ki Nongbishar (Chief Justice and one Justice), ka long kaba eh ban thaw (constitute) ia ka Division Bench, namarba uwei na ki nongbishar u la dei lypa uba rai ia ka kam (case) ba mut ban apil. Kumba la ong ba ia ki Kashari ba halor kum ki Division Bench; constitution Bench, kiba kynthup ia ki arngut ne lai ngut ne san ngut ki nongbishar hap ban thaw (constitute) mardor haba donkam, kumta ban don tang arngut ki nongbishar ha ka High Court, lehse ka long kaba ym iahap satia.
Ha ki bnai ba la dep, ka High Court Meghalaya ka la ioh ia uwei u Nongbishar (Justice) lehse na ka ‘BHAH’ ki nongiasaid ain (advocates). Lehse mynta ka la dokam ban thung shuh sa uwei ne arngut ki Nongbishar. Ka sorkar Meghalaya ka la donkam ba pyrkhat ban tyrwa noh ia ki kyrteng sa ha ka ‘BHAH’ jong ki Nongbishar ki Kashari District Council ka jylla. Lah ban phah ia ki kyrteng jong arngut ki Nongbishar District Council Court, kata ia ki kyrteng jong u Judge bad u Additional Judge bad ban phah sha ka bor ba dei ka ‘Collegium’ ne, khnang ba kan pyrkhat bad pdiang ba kin long ki Nongbishar (Justice) ha ka High Court, Meghalaya.
Balei ba la donkam ban thung Nongbishar High Court sa na ka ‘BHAH’ ki District Council Court, ki daw ki long kumne:

1. Ba ki Kashari District Council ki la don naduh kumba hynriewphew hynriew (66) snem mynshuwa.
2. Ba ki nongbishar jong ki District Council Court kata, u Judge bad Additional Judge ki don ka bor bishar ia baroh ka jait kam (Civil and criminal cases). Ia ki kam bymman (Criminal Cases) la pynkup bor (conferred with powers) ha ki ban rai sdien phasi (Death sentence / Capital Punishment) ne ban pyn-ryngkang-par shi jingim (Transportation for life)
3. Ba shwa ba kin kiew sha ki kyrdan Judge / Additional Judge, ki la dei lypa ki Nongbishar (Magistrate) kiba don ka bor ban bishar ia baroh ki kam (Civil and Criminal Case) la bun snem.
4. Ba ki Kashari District Council, ki long kiba laitluid (Independent) bad ki bym shah teh shah khum ha kino kino ki bor synshar (free from any binding of the Executive).
5. Ba ia kino ki rai jong ki Nongbishar (Judge / Additional Judge) District Council Court lada ngam bakla, ym lah ban apil (Appeal) sha kiwei pat ki Kashari lait noh beit sha High Court.
6. Ba ki Kashari District Council ki hap beit hapoh ka jingpeit jingkhmih jong ka High Court, ha kaba iadei bad ki kam Bishar.
   Nga buh kane ka jingthoh khnang ba ki ‘riewshemphang kum ki Nongmihkhmat badonburom (M.P. / M.L.A/ M.D.C) bad kiwei kiwei ki ‘riewshemphang kiba la pyrkhat bad ban pyniaid shaphrang ia ka kam ne KUMNO’
   Bah K.R Shanpru,
   Pdengshnong, Mawlai Mawroh, Shillong.