Ka Behdeinkhlam ka Sein Raij Tuber

Jowai, 17 Naitung:
Sa shisein ka Sein Raij Tuber kan pynlong biang ia ka jinglehniam Behdeinkhlam ha Tuber kmai Shnong kaba yn sa pynkut ha ka 21 tarik mynta u bnai, halor kane na ka liang ka Sein Raij ka khot bad wer ia baroh ki khun ki hajar jong u Hynniewtrep Hynniew skum ba kin sngewbha ban wan sakhi lang ia kane ka jingshadniam ha shnong Tuberkmai Shnong.
Na ka liang u Secretary jong ka Sein Raij Tuber ma R. Sana, ula iathuh ba ka Behdein khlam jong ka Raij kan sdang naduh ka 18 tarik mynta u bnai ter ter ha ryngkat ka jingpyndep ia ki kam ba bun bad ki niam ki rukom. Ia ka jingleh niam ba khadduh yn pynlong ha kane ka 21 tarik ha Aitnar jong ka Sein Raij.
Kat kum ka jingiathuh jong u Secretary la ong ba u ba u Myntri Rangbah ka sorkar Jylla Dr. Mukul Sangma un wan ban sakhi lang ha katei ka sngi ryngkat kiwei de ki myntri sorkar lem bad ki ophisar sorkar. La iathuh ba ka shadniam behdeinkhlam jong ka Raij Tuber ka dei kawei na ki shad niam kaba heh duh ha ri lum Jaintia, pynkut ka khubor na u Secretary ka Sein Raij ma R. Sana.