“Ka Bangladesh bad ka India ka la mynjur ban pynbun ia ki Border Haat”

Shillong, 15 Naitung:
U High Commissioner ka India Bangladesh u Harsh Vardhan Shringla u la pyntip ba ka India bad ka Bangladesh ka la mynjur ban pynbun ia ki Border Haat ha khappud ka india bad Bangladesh ban kyntiew ia ka ioh ka kot ki paidbah kiba shong basah ha khappud, “Ngi la ia kren ban pynbun ia ki Border Haat na ka 4 sa 25 tylli” u la ong. Katei ka jingkren u Shringla ka dei ha ka jingialang kaba la long mynta ka sngi ha state Convention Centre ha ka por ba la plie paidbah ia ka Tamasa Wah kaba la tip kum ka ‘Nadi 2016’.
Haba phai sha ka jingdonkam ban pynneh pynsah bad ban tyngkai ia ki wah u Shringla u la ong ba ki don haduh 54 tylli ki wah kiba tuid na India sha Bangladesh bad baroh kitei ki Wah ki dei kiba wan na kane ka thaiñ Lam Mihngi bad u la ong ba dei namarkata ka daw ba ka long kaba donkam palat ban pynskhem ia ka jingiadei lok hapdeng ka Bangladesh bad India khamtam bad ka thaiñ Shatei Lam mihngi. Ha katei ka jingialang ki nongkren ki la kren kumno ban sei ki buit ki stad ban tyngkai ia ki wah ki um khnang ba kan long ka jingmyntoi ia ki paidbah jong ki ri ba marjan bad ka India kum ka Bangladesh, Bhutan, Myanmar bad Nepal.
Ia ka ‘Nadi 2016’ la plie paidbah da u Dr.Mukul Sangma myntri rangbah ka jylla Meghalaya, kiwei pat kiba la poi sha katei ka jingialang ki long u Rasheed Khan Menon- Tourism and Civil Aviation Minister ka Bangladesh, u , Minister of state incharge of Foreign Affairs, ka Bangladesh u Shahriar Alam, ki nongmihkhmat na ka ri Bhutan Bhutan, Nepal, bad ki High Commissioner kumjuh ruh u myntri rangbah ka jylla Mizoram.