Shillong:Mynhynnin ka sngi ki samla pule jong ka National Institute of Technology (NIT) ha Sohra, Meghalaya ki la mih puk ban pyrshah ia ka bor pyniaid hadien ba ki la kynnoh, ba ki leh bym suidniew ban pynbiang ia ka kam ka dih, bad ki jingdonkam jongki samla pule.
Haba kren halor kane, ki samla pule ki la kam ba ka bam kaba ki shet ruh ka long kaba khawot bad ka bym iahap katkum ka jinglong kane ka thain, namar ba uba ioh kam ban shet, ula wanrah ia ki nongshet kiba nabar jylla.
“Ki nongshet ki wanrah nabar, ki shet katba ki mon, ka bam ka bym iahap katkum ka jinglong kane ka jaka. Teng teng ki shet ka bam kaba kha wot”, la ong uwei u samla pule.
Ki la kam ba ka bor pyniaid kam shym la pynbiang ia u Wifi, namar ka hostel jong ki kynthei ruh ki la pynsah da ki shynrang, kim pynbiang ia ka Gym ia ki kynthei, ka bording ruh ka lip khah khah bad ka jaka sah ruh ka jaw um haba slap.
“Ka hostel ki kynthei ruh ki pynsah shynrang, ka um dih ruh kam biang, ka ding ka lip khah khah, Wifi ruh um treikam ha kine ki sngi”, la ong kawei ka samla pule. “Hynrei ia kiba pule PhD, ki pynbiang ka bam, katba ia kiba pule ha ka kyrdan ba kham rit, ki leh bym suidniew”, la kam une u samla.
Ki la kam ba ki la pyntip sha ka bor ba dei peit halor ki jingduna bad ki jingeh bad ki jingdonkam jong ki, hynrei ka bor pyniaid ka khlem leh eiei satia bad kane ka la pynbitar ia ki samla haduh ba kin iamih paidbah ban pyllong ia ka jingdawa kaba tyngeh.
Phi don ban ong eiei?