Ka Balang Sardis, bad ka Jesebel

AIS SUJA

Ka Balang sardis bad ka Jesabel. Sardis kamut ba dang sah ne dang neh (remains). Ka jingmut hangne ka long – Ia baroh ki jaitBalang kiba mih naka Balang Thiateira ha u snem 1500 AD ha kata ka por jong ka Reformation, bad kane ka Balang ka dangdon haduh kine ki sngi ba mynta bad kan sa ioh ban rung final sha ki shi taiew ba khadduh ba la ong da u Daniel Nongiathuhlypa. Daniel 9:27. Ki por ba jynjar. Mathaios 24:21. Shaphang kane ka Balang sardis, u Blei u kren bad maham dakaba ong – “Nga iathuh ia ki jingleh jongpha, pha don ka kyrteng ba pha im, hynrei pha long kaba iap. To long pha kaba sharai, to pynskhem ia kiei kiei ruh kiba sah ki jingiaishah jongpha, bad ba kita ki jingleh kiba khadduh jongpha ki long kiba kham bun ban ia kita kiba nyngkong.

Ong u Blei – “Hynrei nga don kawei ban ong pyrshah ia pha, naba pha shah ia kata ka briew ka Jesabel kein, kaba khot ne kam ialade ba ka long ka Nongiathuhlypa bad ka hikai bad ka shukor ia ki shakri jong nga ban klim sih bad bam ia kiei kiei ba la knia ha ki blei thaw (ka nongmane soitan)….. hynrei nga ong haphi ha kita kiba ha thiateira kat ki bymdon kane ka jinghikai ki bymtip ia ki jingjylliew u soitan…. hynrei ia kata kaba phi don, to iabat skhem tat ynda ngan wan. Jingpynpaw 2:19-29.

Kamut ba kane ka Balang kaba don haduh mynta, ka pyrshang ban iaid hynrei ka shah teh ha ki buit thap u soitan, hynrei la katta ruh ka donkam ban iaineh skhem tat ynda u Jisu un wan sha kane ka pyrthei.

Ka Jesebel ka long ka briew kaba kum u Ba laam bad u Ba lak, ka briew jong ka jutang barim ka long ruh ka briew Jentil (gentile) kaba long ka tnga jonh u Ahab u syiem Israel ha ki snem 874-853 B.C.

Ka ktien u Blei ka ong kumne: “Bad ha kaba 38 snem jong u Asa u syiem Judah u Ahab u khun u Omri u la sdang ban synshar ha Israel. U Ahab u khun u Omri u la synshar halor ki Israel ha Samaria 20 snem. Bad u Ahab u khun u Omri u la leh ia kaba sniew ha khmat u Trai palat ia kita baroh (ki syiem) kiba mynshwa jong u. Te kumba ka la long pynban ka kam kaba sting ia u ban iaid ha ki pop u Jeroboam u khun u Nebat. Namar u la shongkurim ia ka Jesebel ka khun u Ethbaal u syiem sidon, bad u la leit shakri ia u Baal u la mane ia u. u la tei duwan ruh ia u Baal ha ka ing u Baal kaba u la tei ha Samaria. Bad u Ahab u la leh kham bun ban pan kwah ia u Trai u Blei ki Israel ban Bitar pynban ia ki syiem ki Israel baroh kiba mynshwa jong u. 1 ki syiem 16:29-33.

U syiem Israel u la shah pynliem ha ka kynthei ka Jesebel, ka la ialam bakla ia u ban mane blei Baal ne blei thaw syndon, ka la wallam bun spah ngut ki Nongiathuhlypa jong u Baal bad ki Asherah. “Te ynda u Ahab u la iohi ia u Elijah u Ahab u la ong ha u – long ma me u nongpynshitom ki Israel? U la jubab- Nga ngam shympynshitom ia ki Israel hynrei ma me kein…… 1 syiem 18:17-19.

Ka Jesebel ka long kaba sniew ka dap da u mynsiem bymman ka la phah pyniap ia Prophet jong u Blei. U Ahab u la iathuh ia ka Jesebel ia kaba u Elijah u la leh bad kumno ba u la pyniap ia ki Nongiathuhlypa da ka waitlam. Exodus 18:20-40. Ka Jesebel ka la phah lamktien sha u ruh…. Te haba u la iohi ia kata u la ieng joit u la phet noh namar la ka jingim u la poi sha Beersheba ha Judah. Exodus 19:1-4.

Kano kano ka Balang, kaba shah ia ka Jesebel, kan long ka jingjot, namar ka shukor ia kiba ngeit ha kata ka Balang. U Blei u maham jur u ong – “Bad ngan pyniap noh ia ki khun jong ka daka jingiap, te kita ki Balang kin tip Nga long ma nga uta u ba iit ia ki khyllai ka dohnud. Jingpynpaw 2:23. Amen.