“Ka bainong jong ka pop ka long ka jingiap”

Ex. Rev. K. Langrin

Ha kawei ka shnong la don uwei u samla uba jaipdeh. Uta um ju leit sha lyngkha bad um ju iarap kam ia la u kpa bad ka kmie la ha kano kano ka kam ruh. La ki hikai bad sneng katno katno ruh uta u iaineh kajuh ka jinglong. Kumta u kpa bad ka kmie ki la beh noh ia u na iing. Ma u ruh khlem da pan map ne kylla bamut, u la mih na iing bad bran u la phet.

Ha kata ka jingiaid ruma jong u u la iakynduh bad uwei u samla uba don kajuh ka jinglong kum ma u uba dei na kawei pat ka shnong. Ia uta ruh u kpa bad ka kmie ki la beh noh na iing namar ba um ju kohnguh.

Haba ki la iakynduh ha lynti, uta uwei u la kylli, “Shano kumne men leit?” uta uba shah ylli u la iathuh, “Nga dei u khun jaidpdeh, nga sslia ban trei ban ktah, kumta nga la shah beh na iing”. Uta uwei pat u la ong, “Kata te me la kumba phah u Blei, nga ruh nga dei u khun ka alhia, nga la shah beh na iing bad nga la shu iaid ruma. Mynta ba ngi la iakynduh para ba shah beh te to ngin ia iaid lang noh”. Uta uwei ruh u la mynjur. Naduh kata ka sngi ki la ia iaid lang.

Ka kam kaba nyngkong eh ba ki la ia rai lang ka long ban leit tuh bad lute ia ki briew katba ioh. Ki la shang arngut arngut na kawei ka shnong sha kawei pat, bad ki la ioh tuh ia ka pisa, u khaw, ki syiar, ki soh bad kiwei kiwei de. Ha kawei ka sngi ki la iohi ia uwei u briew uba bat suloi ban leit sikar mrad sha khlaw. Kita ki jaipdeh ki la iakren, “Lada ngin ioh sa ia ka suloi te ka la biang bha, to ia ngin leit leh mynleh iakren bha bad utai u briew bad sa knieh ia ka suloi”. Kumta ki la leh shisha kumba ki la iakren. Ki la pyrta ia u nongsikar, “Ei bah, phi don jingpruid?” uta uba pli khlem poi pyrkhat u la ong, “Don”. Kita ki jaipdeh ki la ong, “To ngin ia shong dih duma shuwa hangne”. Uta u nongsikar u la shong bad u la buh ia ka suloi ha madan. Katba ki dang ia kyllain duma, uta uwei u jaipdeh u la shim kai ia ka suloi bad u la ong, “Katno bah phi thied kane ka suloi?” Uta uwei pat u la pruid ia ka jingpruid ban pynthang duma ia u nongsikar. Sa uta uwei pat u la tied da ka suloi ia ka khlieh jong u nongsikar. Ynda haba u la kyllon, ki la bom la shoh ia u haduh ban da iap. Naduh kata ka sngi ka jinglute jong ki ka la long kaba seisoh bha da kaba ki leit pynap suloi ia kiba leit iew leit hat, bad ha ki iing briew kiba don sha kyndong. Tang hadien ar bnai ki la ioh lum ia ka pisa haduh ar lak. Ki la leit wad ia ka jaka ban shong ban sah arngut bad ban buh ia ka pisa ha krem.
Ha kawei ka sngi iew, ki la ia pyrkhat mano ban leit thied khaw bad shini na iew. Ki la la rai ba uwei un leit iew bad uwei pat un ap krem. Uta uba leit iew u la kit ia ka khoh ban thep ia ki tiar bad ki jingbam ban sa thied. Katba u dang iaid ia ka lynti, ka mynsiem sniew ka la rung ha u ba ia ka pisa ar lak u dei ban ioh marwei. U la kren wei briew, “Kato ka pisa ha krem ka don tang ar lak, lada iasam arngut yn ioh tang mar shi lak. Te ka bha ba ngan ioh marwei. Kumta, shibit ngan thied jingbam bad ngan ber da ka bih khla”. Sa uta uwei pat uba ap krem ruh u la pyrkhat, “Kane ka pisa ar lak, lada iasam arngut ngin ioh tang mar shilak. Kumta ka bha ba ngan ioh marwei. Ngan ap siat noh da kane ka suloi ia uto u paralok shibit u tang shu poi hajan kane ka krem”.
Uta uba leit iew hadien ba la dep dih sha, u la thied shuwa ia u khaw, ka shini, ka doh bad ki jhur; bad khatduh u la leit thied sa ia u kpu bonsoh. Nangta u la leit thied sa ka bih. U la kylli na man ki dukan, “Bah phi don bih khla?” hynrei kiba bun ki iathuh ba ki don tang ka bih khnai. Ha kaba khatduh u la ioh shisha ia ka bih khla bad u la ber halor u kpu bonsoh. U la dap da ka jingkmen haba u la ioh ia kaei ba u kwah. Haba u la leit phai sha krem u la dap da ka jingphuh samrkhie namar u tip ba uta u paralok jong u un sa iap un tang shu bam ia u kpu. Uta uba ap ha krem ruh u la thap bha ha khmat ka krem ban ap siat da ka suloi ia la u paralok. Haba u la iohi ba uta uba leit iew u la wan, ka shadem jong u ka la kyndeh. U ruh u la kmen namar u tip ba ia ka pisa ar lak un sa ioh marwei. Kumta haba u paralok jong u u la poi ha khmat krem u la siat shi kuli ia u na shadem. Uta uba wan iew u la kyllon kram ha khyndew. Uta uba siat namar ba u la thngan eh, u la kynrup shuwa ia u kpu bonsoh bad u la bam. Mar ia bam u la kyllon kram ha khyndew kum uta uwei. Baroh arngut ki la shu ia peit pyrshah namar kim pat dkut mynsiem. Ki ktien ba khatduh ba ki la iakren ki long, “La dei hok ia ngi ban iap namar ngi la leh ia ki kam kiba sniew”. Baroh arngut ki la dkut mynsiem ha kajuh ka por. Ia kata ka pisa ar lak la shu bam ei da u kruin. Ka jinghikai ba ngi ioh na kane ka khana ka long – Ka bainong jong ka pop ka long ka jingiap.
(Kane ka khana kam dei ka jingjia ba shisha. Hynrei ka dei tang ka jingpynwan dur ki ki tymmen Lyngngam ban sneng bad hikai ia ki khun samla shynrang ba ki dei ban kohnguh ia la ki kmie ki kpa bad ban trei shitom. Wat la ka dei tang ka jingmutdur. Pynban ka urlong shisha ia ki khun samla ki bym kohnguh la kmie la kpa kumba la jia ha ki snem mynshuwa).