Ka Assembly Election – Ki Paidbah bad ki Nongmihkhmat MLA

– U Spiton Kharakor

Ka ju long ka dustur bad ka rukom ha ki ri synshar paidbah, ki ju pynlong ia ki election jied nongmihkhmat MLA ne MP shisien man ka san snem. Ha kane ka Meghalaya Assembly Election 2018 ha ka 27 tarik u February 2018 kan long ka sien kaba phra ha ka ban jied Nongmihkhmat MLA naduh ba sdang ka Meghalaya Assembly Election ha ka snem 1972. Shuwa kane ka snem, haba ym pat don jylla Meghalaya, ka Ri Khasi – Jaintia ka ju phah ia ki Nongmihkhmat MLA sha ka Assam Legislative Assembly naduh ka snem 1937 ha ka por synshar phareng. Ynda la ioh ia ka jinglaitluid ha ka snem 1947 la pynlong ia ka election MLA banyngkong eh ha Assam ha ka snem 1952.

Katkum ka Government of India Act 1935, ka sorkar phareng ka la rai ban phiah ia ka jingsynshar ia ka British India ha ka Provincial (State) Assemblies. La phiah jylla kum ka Bombay Province, Madras Province, Bengal Province, Assam Province ter-ter. La pynlong ia ka Assembly Election nyngkong eh ha kitei ki Province ha ka snem 1937. Ka seng Congress ka la sar bad jop bun eh ha ki Provinces bapher bapher ka Ri India. Hynrei ha ka Assam Province la jop ka Muslim League jong U Muhammad Ali Jinnah u nongseng ia ka Hima Pakistan.

Kumta, U Muhammad Sa’adullah u la long u Prime Minister ba nyngkong eh ka Jylla Assam ha ka snem 1937. Hynrei ha ka snem 1938 la ioh knieh long Prime Minister pat sa u Gopinath Bordoloi jong ka Congress. Hynrei hadien la knieh biang sa u Sa’adullah bad long Prime Minister sa shisien pat haduh ynda kut ka thma bah ba ar ha ka snem 1945. U Rev. J.J.M. Nichols Roy bad ka Kong Mavis Dunn Lyngdoh ki la long ki Minister Assam iwei hadien iwei ha ka sorkar Muslim League jong u Muhammad Sa’adullah.

Kumta, lada khein ia ka jingioh long MLA ha Assam naduh ka snem 1937 haduh ka snem 2018 ha Meghalaya kumba 81 snem. Ka la lah ban sei da ki bun spah ngut ki MLA. U Rev. J.J.M. Nichols – Roy u la ioh long Minister Assam naduh ka por Phareng, I Kong Mavis Dunn Lyngdoh I la long I Minister kynthei iba ar ha ka por Phareng napdeng ki kynthei ban long Minister ha ki Province jong ka Ri India. Kiwei pat ynda la laitluid ki la ioh long Minister ha ka sorkar Assam. U Chief Minister Meghalaya ba nyngkong na ka jaidbynriew jong ngi u dei u Rangbah Darwin D. Pugh ha ka snem 1978.

Ka kyrteng ki MLA ba jop lyngba ki Assembly election 1937, 1946, 1952, 1970 bad 1972 ki long kumne:-

British India Assam Assembly Election 1937 – 45
Shillong – Rev. J.J.M. Nichols – Roy, 2. Jowai – Rev. Lowell Gatphoh
Women Constituency – Kong Mavis Dunn Lyngdoh
British India Assam Assembly Election 1946 – 51
Shillong – Rev. J.J.M. Nichols – Roy, 2. Jowai – Lar Singh Khyriem
Women Constitunecy – Kong Bonnily Khongmen
Assam Assembly Election 1952
Shillong – Rev. J.J.M. Nichols – Roy (Congress), 2. Jowai – Kistobin Rymbai (Ind)
Nongpoh – A’aron Alley (KJNFSC), 4. Nongstoin – Ajra Singh Khongphai (Ind)
Cherra – Maham Singh (KJD)
Meghalaya Autonomous State Provisional Legislative Assembly 1970-71

Ka Meghalaya Autonomous State ka la sdang naduh ka 2 tarik u April 1970. Ka la kut noh tang shu plie ia ka Meghalaya Full State ha ka 20 tarik u January 1972 ha madan Polo da ka Prime Minister Indira Gandhi. Ka Meghalaya ka la sdang naduh ka 21 tarik u January 1972.

Shuwa ia kata, ka don ka Meghalaya Legislative Provisional Assembly. Ki lai tylli ki District Council ka Khasi Autonomous District Council, ka Garo Hills District Council bad Jowai Autonomous (mynta JHADC) ka phah nongmihkhmat Nominated MLA 41 ngut. Ka Khasi Hills Autonomous District Council ka shu thung (nominated) 18 ngut ki MLA, ka Garo Hills District Council ka thung 16 ngut bad ka Jowai ka thung 4 ngut. U President ka Ri India u la thung 3 ngut ki dkhar kum ki Nominated MLA. Baroh long 41 ngut ki MLA ha ka Meghalaya Autonomous State Provisional Legislative Assembly.

Ki Nongmihkhmat MLA Nominated KHADC na Khasi Hills ki long:-

Alwot Berry Diengdoh, 2. Brington Buhai Lyngdoh, 3. Darwin D. Pugh
E. Bremly Lyngdoh, 5. Galynstone Laloo, 6. Gilfred S. Giri, 7. Humphrey Nongrum
Justly Rynshon, 9. Justman Swer, 10. Lobendri Hujon, 11. Kong Maysalin War
Molendro Nath Swer, 13. Paty Ripple Kyndiah, 14. Prof. Radhon Singh Lyngdoh
Rokendro Dkhar, 16. Stanley David Donbor Nichols – Roy,
Simon Jenkin Duncan, 18. S. Phaindrojen Swer

Jowai (mynta JHADC)

Beryl Sutnga, 2. Edwingson Bareh, 3. John Deng Pohrmen, 4. Ohiwot Khonglah

Assembly Election 1972 – 77

Ka kyrteng ki Constituency bad ki Nongmihkhmat (MLA) ba jop ki long: –

Jowai (ST) – Blooming Shallam (APHLC), 2. Nongtalang (ST) – Enowell Pohshna (Ind)
Rymbai (ST) – Lewis Bareh (Ind), 4. Sutnga (ST) – Onwardlesy Well Nongtdu (Ind)
Nartiang (ST) – Edwingson Bareh (APHLC), 6. Mynso – Raliang (ST) – Humphrey Hadem (Ind)
Mawlai (ST) – Standlington David Khongwir (Ind),
Mawkhar (ST) – Alexander Warjri (APHLC), 9. Jaiaw (ST) – P. Ripple Kyndiah (APHLC)
Mawprem – Maham Singh (Cong), 11. Shillong Cantt. – Dhruba Nath Joshi (Cong)
Laban – Parsvanath Choudhury (Cong), 13. Malki – Upstar Kharbuli (Ind)
Laitumkhrah – Peter Garnett Marbaniang (APHLC)
Nongthymmai (ST) – Brington Buhai Lyngdoh (APHLC)
Nongkhlaw (ST) – Hoover Hynniewta (Ind), 17. Nongpoh (ST) – D. Dethwelson Lapang (Ind)
Mawhati (ST) – Prof. Martin Narayan Majaw (Ind)
Sohryngkham (ST) – Grosswell Mylliemngap (Ind)
Nongkrem (ST) – Prof. Radhon Singh Lyngdoh (APHLC)
Dienglieng (ST) – Betterson Kharkongor (APHLC), 22. Umroi (ST) Dlosingh Lyngdoh (Cong)
Mylliem (ST) Jormanik Syiem (APHLC), 24. Sohiong (ST) – Edward Kurbah (Ind)
Nongspung (ST) – Winstone Syiemiong (Ind),
Mairang (ST) – Y. Fuller Lyngdoh Mawnai (Ind)
Pariong (ST) – Hopingstone Lyngdoh (Ind), 28. Nongstoin (ST) – Francis K. Mawlot (Ind)
Mawthengkut (ST) – Raisen Mawsor (Ind), 30. Langrin (ST) – Humphrey Nongrum (APHLC)
Mawkyrwat (ST) – Rowell Lyngdoh (Ind),
Mawsynram (ST) – Kisto Mohon Roy Marbaniang (APHLC)
Shella (ST) – Stanley David Donbor Nichols – Roy (APHLC)
Sohra (ST) – S. Phaindrojen Swer (APHLC), 35. Nongshken (ST) – Darwin D. Pugh (APHLC)
Langkyrdem (ST) – Galynstone Laloo (APHLC)

Kat kum ka list haneng, la shem ba ka jingdon ki Nongmihkhmat MLA na ka jaidbynriew Khasi ne Hynniewtrep naduh ka snem 1937 ha ka por Assam bad haduh ka election Meghalaya 2013-17 ki la don da ki bun spah ngut ki MLA haduh mynta. Ka kam ki MLA ka long ban ia tuklar, iasaid bad thaw ain. Te lada jia ba ki MLA ki shu ia kbum ia ka shyntur ha Ing Dorbar Thawain, te la long kam kai bad lehnohei ka jinglong MLA jong ki.

U Bishnu Ram Medhi, Chief Minister Assam ha ka snem 1951, u la pynrung ia ka Bill ban rah noh ia ka Block I & Blcok II na Jaintia kaba heh haduh 1543.6 Sq. Km na Jowai Sub – Division sha Mikir Hills. U MLA Jowai u ia pyrshah tang da ka jingthoh Dissent Note jong u ha ka Boundary Committee. Nangta u MLA ka Shillong Constituency, uba long ruh de u Cabinet Minister ka Assam u shu sngap la ka sngap khlem kren pyrshah nia ia u Chief Minister Medhi. Kumta ka Bill ka la kylla ain hadien bad ka Ri Jaintia ka la duh ei ia ka Block I bad Block II junom, khlem ka jingialeh da ka thma wait ne thma ktien.

U Bah Bnein Bareh, uba la long teng u Non-Official Chairman ba nyngkong ka Shillong Municipal Board ha ki snem 1960…….. wat la um shym la dei u MLA, pynban u la kren ha Assam Assembly na visitor’s gallery bad beh ia ka sorkar Assam da kaba bret nalor ia ki pamphlet “mih noh khar Assamia” ha ka snem 1968.

Napdeng ki MLA bym don shuh, haba nga shong sngap kai na “visitor’s gallery” ka Meghalaya Assembly, nga shem ba ki MLA radbah kum u Rangbah Hoover Hynniewta bad u Prof. Martin N. Majaw, ki long kiba tbit bad pnah thylliej haduh katta katta . Ngam tip ia ki MLA ba mynta, ioh ki kham tbit ma ki bad tam ia kitei ki arngut. Tangba nga tip haba ki ieng kren kitei ki arngut ki MLA lada ki iaishah ne iapyrshah, ka Ing Dorbar baroh kawei ka sngap jar kumba ong noh “pin drop silent”

Ngi angnud ba ki MLA Meghalaya 2018-2023 kin long kiba pasiang u thylliej bad kiba nang ban padiah ha ka iasaid dorbar. Ki dei ban long ki longkni longkpa ban kit ia ka khia ka shon bad ka jingeh ki paidbah. Ka jingkyrduh kam jong ki samla bym don ki “Vocational Schools” ban pynkhreh ia ki apprentice (ban pyntbit) ha ki line kam bapher ban pynioh lad ai kami a ki khun samla. Sa kane ka bhah thungkam 40 percent ia ki Khasi-Jaintia heh paid bad u Garo khyndiat paid ka long ka tarajur leh shiliang. Ka shong ha ki MLA thymmai ban leh eiei. Ne phin klet noh tang shu jop MLA, shu en bad shu sngap bym nud saham ha khmat ki Chief Minister Sangma kumba long baroh shikatta.

Ha ka pyrthei kaba iar, ngi lap ba ki nongmihkhmat paidbah kiba duk ki ju ioh long MP ne MLA. Ym tang katta ruh, hynrei ki la ioh long Prime Minister de. U Prime Minister Woodrow Wilson bad u Prime Minister John Mayor jong ka Ri Bilat ha ki por ba la leit ki long kiba duk bad kim la riewspah wat ynda ki la shongthait na ka kam Prime Minister. Kumjuh ruh u Prime Minister Lal Bahadur Shastri hadien u Nehru haba u iap kyndit ha Tashkent, U.S.S.R ha ka snem 1966, um shym riewspah bad um don eiei ban kam trai la ka jong.

Hynrei ha Meghalaya, kiba ialeh MLA katkum kaba paw ha ka por ba ki thep kyrteng “Nomination Paper” khamtam kiba la bat Minister teng ki la dei ki Multi-Millionaire ne Crore – Pati suda. Ngi kyrmen ia kiba kin jop biang, khnang ba yn lah ban pyllait ram ia ka sorkar dap ram Meghalaya. Ka Meghalaya Power Electric Corporation ka dap ram ha ka Power Grid, NEEPCO da ki bun spah klur tyngka. Kam shym lah siew ia ki PWD Bills Contractors ia ka Rs. 500 klur tam eiei. Ym shym lah siew ia ka tulop Nonghikai Skul. Ki paidbah Meghalaya ba duk ne BPL ki don haduh 66 percent kim ioh jaka thaw ing bad jaka rep ban rep. Ia ki Ri Raid ba buh u mynbarim la pynkylla Rikynti ne khyndew shimet. Ki MLA kiba jop kin hap deng bad phong ia ki pansngiat shiah kiba thar namar ba ka sorkar Meghalaya leh lut phut dap ram 2013-17, ka ai pateng ha ki MLA thymmai. Ka sorkar cabinet thymmai Meghalaya kan hap ban sait ram lut ioh nang kha ka sut. Tang pher tiak, ka sut ka lah ban kylla trai bad nang hap siew sut u paid Meghalaya ba duk.

Ki MLA naduh 1972 haduh 2013 barim tam ki dei u Rangbah Hopingstone Lyngdoh, Dr. D.D. Lapang bad Rangbah Rowell Lyngdoh marwei, u long u rangbah bad ba la tymmen tam ban iakhun biang ha ka election 2018 na Mawkyrwat naduh ka snem 1972. Ngi ai khublei ia une u riewrim nongialam ba kumba la kyrmen un jop shisha ban shakri ia ka Ri.

Baroh shikatta la ioh Chief Minister ha Meghalaya kham slem bad bunsien tang ki Garo Raja suda. Ha East Khasi Hills la pynmih Chief Minister kum U Rangbah D.D. Pugh, B.B. Lyngdoh, Dr. Flinder Anderson Khonglam bad u Rangbah Donkupar Roy. Na Ri Bhoi la ioh long Chief Minister u Dr. Donwa Dethwelson Lapang, Evansius Kek Mawlong bad u Rangbah J. Dringwell Rymbai. Mynta ka dei sa ka pali na ka Ri Jaintia jong U Kiang Nangbah bad U Woh Kiri Dolloi ban ioh long Chief Minister ha Meghalaya. Kumjuh ruh ka Ri U Tirot Sing bad Syiem Sngap Sing ka Hima Maharam West Khasi Hills bad ka South West Khasi Hills ki don ka hok ban ioh long Chief Minister ha Meghalaya.

Ki khun u Hynniewtrep ki ju iapra tang shu wan ka election. Don kiba ialeh election lyngba ka Indian National Congress, ka Bharatiya Janata Party, National Peoples Party, People Democratic Front, KHNAM, United Democratic Party bad HSPDP. Kat haba ki don, kam lei – lei tangba ki dei ban wanrah 31 MLA ban pynlong ka sorkar shiseng. Lada ym iatylli te la lehnohei to tip para ri, it is a long way to Tipperary kumba ong mano re.

Haba phaidien ia ka election result jong ka 31 – Ranikor (ST) Constituency 2013, ngi lap ba u Khasi um iatylli satia, u Rangbah Probin K. Raswai (UDP) u la ioh 8674 votes, u Cornelius Nongbri (NPP) u la ioh 3000 votes, u Rangsandor Syiem (HSPDP) u la ioh 238 votes bad u Desmond B. Wanshnong u la ioh 136 votes. Baroh lang ka long 12108 ki votes, u Martin Danggo (Cong) u la ioh tang 9189 votes bad u la jop ioh long MLA. Ki paid Khasi bun votes ki la rem election tang na ka daw ba kim iatylli para Khasi para Hynniewtrep.

La ong ba ka election MLA 2018 ka lah ban long ka election kaba khadduh na ka bynta ki 60 MLA. Mynta santylli ki MLA seat ki la dei lypa ki General Seat, kum ka South Shillong, West Shillong, Pynthorumkhrah ha East Khasi Hills, Rajabala bad Phulbari ha Garo Hills.

Ha ka election MLA 2023, yn lah ban pynbun MLA katkum ka Census 2021. Ka Election Commission ka ong ba ka Meghalaya mynta ka don nongshong shnong haduh 3 million shiteng ne 35 lak. Ki khun u Hynniewtrep ki don mynta hapdeng 13 bad 14 lak tam eiei. Ki dkhar nongwan buhai shnong na ki 12 jylla bad kiwei ki don haduh 21 lak tam. Shu buh, lada hadien ba yn thaw Assembly Constituencies lyngba ka delimitation thymmai, te yn lah ban kiew MLA Meghalaya lehse sha ka 70 ngut ei ei ha ka Assembly election 2023. Te lada ha ki General Seat kin lah ban kiew sha ki 40 seats eiei bad tang 30 seat kin sah Schedule Tribe (ST) seat. Te u khun u Hynniewtrep u la sah khyrdong sharud ha ka Hill State Meghalaya, lah ban long rit paid bad nongwei ha la ri.

Ki riewlum Jharkhand ki ialeh Hill State haduh Sanphew snem. U Prime Minister u Atal Bihari Vajpaye u la ai Hill State ia ki, hynrei la shem ba ki trai ri ki riewlum ki ioh MLA tang 21 ngut na ki 81 MLA Jharkhand. Ki riewlum Tripura ki don tang 20 (ST) Assembly seats na ki 60 MLA Tripura. Ki Lepchas ki trai ri Sikkim ki ioh reserve MLA seat tang kawei ka seat na ki 32 MLA ka jylla Sikkim. Ki nongwan buhai shnong ki la ioh MLA haduh 31 ngut.

Ngi don tang kawei ka ri Talawiar U Sohpetbneng kaba la don bad la rim naduh 1200 snem shuwa u Khrist ha ka pyrthei, bad kata ka dei ka Bri U Hynniewtrep naduh na sepngi shiliang ka Wah Rilang haduh mihngi ka Wah Kupli. Lada ngi duh noh ia ka, kumba long ki nong Gibbon ba la iathuh u Babu Soso Tham ha ka kot Ki Sngi Barim U Hynniewtrep, ban long nongthoh dieng bad nongtong um iano re. Te la sngewrem ka mynsiem bym don lawei ia ki longdien jong ngi. Ngim kwah ban long kum kita ki nong Gypsy ki bym don la ka ri “kiba shu kai surok bad khun bad kti da ki Caravan ha South Europe bym don ri la ka jong”

Naduh ka snem election MLA 1937 haduh ka election 1978, la ong, ki party units ki ju pynbiang sha pynbiang dud ha ki sngi thep vote election ia ki volunteers lajong bad kiwei. Ki candidates kim ju tyrwa pisa ne tyngka eiei. U paidbah ruh um ju dawa pisa, u paidbah ba iar, bad wat u khynnah rit ruh u kyrdem bad iuh da ka kjat shuwa ban tam ei na surok ia ka tyngka ioh ei. Um ju rah sha ing bad shu bam shana sngewbha ei bad ki paralok. Ka tyngka ioh ei, ka tyngka bam ei kam ju bit ban pynrung ha ing, hynrei mynta ha ka election MLA 2018 pat la kylla khongpong bad la kylla mulot lu. Ia kwah satang ka iohei suda, ka dih khor dih kyiad ei bad ka bam tyngka ei na ki candidate ialeh election mynta ka kynti. U bapli u candidate ba kwah jop election palat, u ther lut katba don ka kyndong kynshrot. Lada jop, te niuma ym lei-lei, u don ki scheme ban thaw ban buria ia ki jinglut jingsep. Te hynrei lada rem te la long kum u Sier Lapalang kynrem reng la shu jaw ummat haduh ki sngi jong ka jingiap.

To ai ba ki kti ba phi la kum taner bad pdiang ba pynbam tyngka u candidate election ia phi mynta. Hynrei phim dei pat ban kynshew ia ka, bad phi dei ban bret lut ia ka, ia kane ka pyut ha u budam N.O.T.A (None of the above) jong ka electronic voting machine, kumba la ai jingmut u Bah Morning Sumer u Free – lance Journalist jong ngi. Lada ngi kwah ki M.L.A ba khuid, ka sorkar Meghalaya ba khuid, te ngi ki voters. Ngi dei ban sait khuid shuwa ia la ka kti ban thep vote ban ioh ia ki M.L.A riew khuid mynsiem. Ngim kwah ia ki sorkar klet briew, tip blei aiu bym poi shaei shaei ruh?

Kumta, haba phin leit thep vote ha ka 27 tarik u February 2018. Sngewbha duriap, puson bad pyrkhat janai ryngkat ki jingdwai ha U Trai Kynrad. Kane ka jingleh jong phi kan long ka jingkyrkhu ym tang iaphi marwei, hynrei khamtam ia ki longdien jongphi bad ka jaidbynriew. Ka shi vote ba phi thep ka lah ban long ka jingjot ne jingjop ia ki pateng ban long ne em ki kynrad ha ka Bri U Hynniewtrep junom ?

Ki MLA kiba jop lyngba na kano kano ka seng ne party ne shimet ki hap ban buh ia ka jaidbynriew Hynniewtrep ha khmat. Ki political party bad seng sain hima kaba phi don ki dei ban long hadien. Ha ka kyrteng bad ka nam u Paiem Tirot Sing bad U Kiang Nangbah, ngi dei ban iatylli kawei ba ka ri bad ka jaidbynriew jong ka ri um snam u Ni u Kong kan im junom. Khublei.

– Advertisement –