Ka Assam, ka shu lehkai ia ka Ri Khasi

Katba ka jia, ki jing shisha, ki kdew ba ka Assam, ka la shu lehkai ia ka Ri Khasi Jaintia bad kane ka jinglehkai, ka la kylla long ka kam pohjait kaba la i triem sat ha kine ki sngi, ha kaba ki briew jongka, naduh ki khar Nepali, ki pulit bad kiwei de ki paidbhur, ki shim kabu bad iai pyndik ia ki nongshong shnong kiba don sha khappud bad wat sha ki shnong, kiba jngai na u pud u sam bad kane ka pyni, ba ngi dei ka Jylla, kaba shu shah bad shu sngap.
Na ki hynniew tylli ki jylla jong ka dong shatei lam mihngi, ngim ju kham iohi, ban don ka jing ia kynad kaba jan man ka sngi, kumba long hapdeng ka Assam bad ka Meghalaya bad ha man ki jing ia kynad, ngi iohi, ba u paidbah, u dei u sohpdung bad lait na u paidbah, ym don shuh mano mano ba iarap bad iada ia ki bad kaba lyngngoh ka long ba ki pulit, ki majistor, kim ju ialeh satia, wat tang shisien ban pyni bor, halor katei ka kam shah thombor jong ki trai shnong lajong.
Ki jingjia lada dei ha Langpih, lane ha kiwei ki bynta jong ka West Khasi Hills, nangta ha Balakhwa lane sa kiwei ki bynta ka thain Ribhoi bad nangta sa sha Jaintia Hills, ngi iohi ba ki dei ki kam thombor ia u riew paidbah, ia u luk u lak, uba khlem tiar ialeh, hynrei, uba shu shah pynhiar kput na ka por sha ka por, tang namar ba u kam trai ia la ki jaka ki puta.
Ka jing khein poh jait jong ka Assam, ia ki Khasi, ka long kaba la palat than, haduh ba ka kham ieid ia ki Nepali kiba don ha Langpih ban ia ki Khasi bad katei ka paw shai, ba na ka daw jong ki Nepali, ki pulit Assam, ki pyniap ia 4ngut ki trai shnong Langpih ha u snem 2010 bad kam dei shuh tang katta, ka Assam, ka wan rung shaduh sha Balakhwa, na bynta ka jing shah pynjot ka iing briew bad kam dei ban iada, hynrei ban kem bad set phatok, ia uba shah shoh bad shah pynjot iing.
Ki nongialam sorkar lane ki nongialam paidbah, ki la pheil lut nadong shadong halor kane ka phang bad kam myntoi ban pyndik ia ki paidbah kiba shong sha ki khappud, hynrei, ka la bha, ba lada kim lah ban iada ia la ki jaka puta, ki la dei ban ailad ia ka Assam, ba kan pruid dak ia u pud jongka, namar ba ha shwa u snem 1972, ngi dei hi ki briew jong katei ka Jylla. [rms]