Ka Assam ka leh China ha Langpih

B.M.Lanong

Ka jingwan tuid kita ki hajar bike-arshaka na Assam sha thain Langpih ha kine ki sngi, imat ba la bun ka shlei um sha ki, kam iapher ei-ei, na kaei ba ki shipai China ki leh ha ki lum thah Galwan, Ladakh. Lada dei tang na ka bynta kata ka daw shlei um, balei ym iarap lada ki wan da ka jingtip bad jingsngewthuh, hynrei kam da dei kata ka shlei um, ka dei ka jingthmu lyndet ki riew shutia hui-hui, ban wan peit bad ban skut jaka da ka bor, kumba ki la leh ter-shi-ter sha kine ki thain Kamrup-West Khasi Hills.

Kawei ka MLA kynthei ruh hana, dang shen hi ka wan kiew sha Langpih, bun ki pyrkhat ka Puri aiu kane kaba wan poi, tip ma ka dei pynban ka MLA na border Assam, tip ka mut aiu, ka tip aiu shaphang kine ki kam iakajia pud, namar kat kata ka MLA te kan sei ia kane ka mat ha Ing Dorbar kein, khnang ban pynim biang ia kane ka mat sahteng. Kum kine ki jingwan rung shit khlieh sha shnong kiwei, khamtam da ki briew na kiwei ki jylla, kiba don ruh ki jingthmu ba sha lyndet, ka long pyrshah ia ka ain rung kulmar sha jaka kiwei (Trespass), ia kaba ki bor sorkar ki dei ban ujor da ka kies. Ban shu sngap, kan nang wanrah jingma.

Ka Assam ka la siat iap ruh ia ki briew ha Langph ha u snem 2010. Nangta sa kata ka kwah shna dam ring ding, shna surok ha kylleng, leit kyntur sha thain Malangkona dang shen ban ioh kurup ia ka kshaid, namar ba shit palat sha rithor bad kum kine suda ha shi lynter ka thain Rani Jirang bad ha kylleng kine ki thain.

Ka Ri Khasi Ka Nang Rit
Ka ri Khasi ka la nang rit lada ianujor ia ki pud ki sam kumba long mynshuwa. Ki don bun ki daw halor kane, kum ka jingkwah ka sorkar Assam ban kyntur sha ki lum khasi ba pyngngad da ki dieng ki siej, ki um ki wah ba pyntngen ban ioh ei bun ki jingmyntoi.

Don pat ba ki nongshynshar Hima, Raid, Shnong, kiba kwah pisa ei, ki die lilam sha ki mynder, sa wan lang sa da ki ophisar Assam ban kyntur lang. Naduh Raid Marwet (Khanapara) ter shaduh kitei ki thain West Khasi Hills, kane ka jingskut khyndew, die khyndew sha ki bar jylla, pyrshah ia ki kyndon ka Land Transfer Act, ka dang don haduh mynta, lyngba ki kam sop-sop ba don kti ki nongpyniaid Hima, Raid, Shnong.

Ka sorkar bad ka District Council ka dei ban trei tyngeh ia kine ki ar-lai maloi, da kaba tohkit bad kem lut ia ki hapoh ki kyndon jong ka ain. Lada kumta, la leit lut u pud u sam.

                                        Ka Chandrachud Committee

Ha u snem 1985, ba dang long Chief Minister u Capt. Sangma, ka sorkar Congress Meghalaya bad u Hiteshwar Saikia ka sorkar Congress Assam, la thung da ka jingiamynjur lang ia kata ka Chandrachud Committee, kaba khlieh da u Y.V.Chandrachud, Chief Justice (CJ) barim ka Supreme Court bad u V.S.Deshpande CJ ka Delhi High Court, sa kiwei de ki dkhot ban iarap, ka la shim bishar ia kane ka kam iakajia pud kine ar jylla.
Ha ka jingbishar, ka Meghalaya ka la kdew, ba bun ki pud bad ki shnong ki thaw kiba don ha ki thain Kamrup Assam, ki dei kiba don hapoh ki Hima Khasi, naduh myndai.
Nangta la kdew ruh na ka liang ka Meghalaya ia bun tylli ki shnong ki thaw kiba don hapoh Kamrup, hynrei namar ba ki dei ki shnong Khasi jong ki Hima Khasi, kumta ki la shim bynta ban don hapoh ki Electoral Roll election 1952 ha Khasi Hills.
Nalorkata, ka U&J Hills District Council ka la thung Nonghikai skul ruh ha ki skul jong ka kiba hab hapoh Kamrup. Ia kitei baroh ka Assam ka kyntait beit bad ka pyrshah hakhmat ka Commission bad ka pynksan ban iaid katkum ka Constitution.
Na kata ka daw, ka Chandrachud Commission hadien ki jingtrei shitom jong ka, ha ka Report jong ka ha u July 1987, ka la shu pynkut da kaba kdew ia kitei ki mat bad jingiasaid baroh, hynrei kam lah rai ei-ei, haba ki ar jylla ki iaring tyllai.
Ka pynkut da kaba kynthoh, ba ngim lah ban pynrem ia ki Khasi halor ka jingsngew khia jong ki ia kiei kiba ki kdew. Ngim lah ruh ban pynrem ia ka Assam ba ki ieng ha ka nongrim ba ka Constitution ka kdew.
La iathuh ki rangbah hadien, ba u Hiteshwar Saikia u ong ia ki rangbah Meghalaya, ‘to bat ma phi ia ki dulir, ka khyndew ngan dang bat ma nga.’
Pynim Biang Ia Ki Jingiakren
Ka paw shai kdar, ba ka sorkar Congress u Hiteshwar Saikia ha Assam, ka sorkar Congress u Capt. Sangma ha Meghalaya bad ka sorkar kmie Congress ha Delhi, kine 3 Congress kim shym lah leh ei-ei bad ki la shu ieh lyngkrang noh kat ia kane ka kam, ban jynjar ki paidbah lynter mynta.
Dei namar ka jingleh ki nongialam Congress, ba ka Assam ba donbor ka iai thom ia ka Meghalaya, lynter tait.
Mynta ka kam ka la sdang khluit shuh-shuh, namar la wan bret bad pynshong jubor ruh ia ki mynder khlem jylla, kat haba ka sorkar Assam ka sngewbit, khnang ba lyngba jong ki, mynta ka sdang kyntur jubor kylleng-kylleng.
Dei namar kata, ba ka sorkar khlieh BJP ha Assam bad ka sorkar khlieh NPP ha Meghalaya, kiba iadei bad ka sorkar u Modi ha Delhi, ki dei ban pyrshang sa shisien, ban iakren pynbeit noh ia une u pud u sam, kynthup ruh ia ka Block I, Block II ha Jaintia Hills bad ki bynta ba dang sah ruh sha Garo Hills, katkum ka jingiaid ka por bad ka jinglong ka kam, ha kajuh ka por ruh, ban pyndonkam ia ka mynsiem ban ia ai-ia shim (spirit of give and take) katba shah ka lynti, da ka jingiabeit lang.
Kat bym pat lah pynbeit, ka Sorkar Meghalaya ka dei ban kham pyneh sha kine ki thain iapher jingmut da kaba pynap pulit, ban ym ailad ia ki jingleh donbor ka Assam, khnang ban don ka jing jai-jai.