Ka America, ka dei ka ri, kaba kiew stet bha ka coronavirus

Ka United States, ka dei ka Ri, kaba ki don bun tam kiba pang corona ha ka pyrthei, ha kaba kiba ioh ia katei ka jingpang, ki la poi mynta sha ka 92,000ngut ha kylleng katei ka Ri.

Ka jingkiew jongka ha ka shisngi, ka long ka bym pat ju jia ha kano kano ka ri jong ka pyrthei, wat la ka jingiap, ka dei kaba bun tam haduh mynta ha Italy. Ka jingdon ki nongpang ha Italy, mynta ka long 86,498ngut bad kiba iap, ki la poi sha ka 9,134ngut, katba ka jingdon kiba pang ha China, ka poi sha ka 81,340 ngut, katba ha America, kiba ioh pang thymmai tang hynnin shi sngi, ki kiew sha ka 16,819ngut.

Ka nongbah New York, ka dei ka ktem bah jong katei ka jingpang, ha kaba ki don 519ngut kiba iap ha ka sngi thohdieng, kaba kiew na ka 365ngut ha ka sngi palei na kiba iap bad ka jingkiew ka jing ioh pang bad ka jingiap, ka kham stet wat ia ka nongbah Madrid jong ka Spain, lane ka Lombardy jong ka Italy.

Kiba ioh pang ha New York, ki don 6,103ngut ha ka sngi palei bad ki kham bun, ban ia ka Italy, kaba don 6,203ngut kiba pang hynnin ka sngi.

Ka jingiap briew ha Italy hynnin ka sngi, ka la kiew sha ka 969ngut, katba kum ka jingkhein, kaba la ioh thikna na katei ka Ri bad katei ka dei ka jingiap kaba bun briew tam ha ka shisngi, ha kaba baroh kiba iap, ki la poi mynta sha ka 9,134ngut ha katei ka Ri.