Shillong:Ka dorbar shnong Muktapur, kaba don ha khappud jong ka Bangladesh, ka ai jingiaroh ia ki shipai BSF, kiba don ha katei ka thain.
Ha ka kyrwoh, la pynsngew ba naduh ba la shimti ia ka kam jong u Coy- commander BSF, da u Arun Kumar ha Mutkapur BOP 4th BN BSF, ka la wan ka jingiasngewthuh lang hapdeng ki BSF bad ki paidbah bad la ong ba ia kino kino ki jingbym iasngewthuh jingmut/jingeh hapdeng ki arliang mamla la pynbeit kloi khlem kano kano ka jingpynslem bad la ong ruh ba une U Commander, u long u briew uba sngewrit shibun bad um ju sngew ba u kham halor ia lade bad ki paidbah, ym kum ki katto katne ki Coy-kommandan ba mynshuwa ki don ia ka jinglong.
La ju khot ia ki dkhot ka EC jong ka shnong Mutkapur bad ki shnong ba marjan ban iakren bad iatrei lang hapdeng ki BSF bad ki paidbah na ka bynta ka bha ka miat bad ka jingshngain jong ki paidbah ka thain bad u ju kyrpad ia ki briew ban phone ia u lada don kano kano ka jingbym iasngewthuh jingmut/jingleh bakla ba la leh da ki briew jong ka BSF bad la ong ba naduh ba u la shimti ia ka kam kum u Coy-commander ka Mutkapur BOP, ym shym la don kum kine ki jingeh.
Na ka liang jong ka shnong, ka iathuh ba ka Ambulance bad ka JCB kaba la buh ha Mutkapur BSF, BOP ka long shisha ka jingkyrkhu ïa ki paidbah nongshong shnong, ha kaba bun ki nongpang ki la poi sha ki Hospital haduh Shillong, Jowai, Amlarem, Dawki ha ka por kaba biang namar ka jingdon jong ka BSF Ambulance bad kata ruh khlem jingsiew ei ei bad ym don wat tang shi tyngka ba la siew ne pan da u BSF, haba leit ialam ia ki nongpang sha ki hospital.
Ka dorbar shnong, ka ong shuh shuh ba ha ka por lyiur ki ju don beit ki jingtwa khyndew bad jingkhang surok ha ka thain Mutkapur bad da ka jingdon ka JCB ki BSF, la lah ban pynkhuid ia ki surok na ka bynta ka jingsuk jong ki paidbah bad kata ruh khlem jingsiew.
Nangta ki don ki kam iarap, ba la ioh da ki tiar na ka bynta ka Dorbar Shnong, ki skul, ki Balang, ki Mandir, ba kynthup ia ki Komputer na ka bynta ki skul, ki kor pynkhuid um, ki shuki, ki miej, ki tarpal, ki jaka sumar, ki concert, ki jaka bret jaboh, ki syntex, ki tiar shet jingshet khlem jingsiew.
Shuh shuh ki BSF, ki ai jingtip shaphang ki skhim sorkar bapher bapher bad ki lum wat ia ki kyrteng jong ki nongshong shnong kiba kwah ban shim ia kita ki skhim kum kaba ri sniang, ri syiar bad kiwei kiwei, ong ka khubor na u bah Benediction Buam, Waheh Shnong, Muktapur.
U Mynsiem jong U Blei U iatrei lang bad ki briew ba sngew rit kiba don ha ka BSF, ngim dei ban klet ban duwai na ka bynta jong ki ba U Blei Un ri Un da ia ki na kaba sniew bad Un kyrkhu kyrhai ia ki met bad mynsiem.