Ka ain thymmai na ki Taliban “Ym bit ban khap tmain ia ki shynrang”

Ki ehrang Taliban, hynnin ka sngi, ki la pynmih ia ka hukum ba thymmai bad kata ka long kaba khang ban khap tmain, ia baroh ki shynrang bad la mana ia baroh ki dukan khap shniuh, ba kam bit ban khap tmain ia ki shynrang, kiba leit khap shniuh bad la pynshong nongrim ia katei, katba kum ka ain Shariah jong ki Muslim.

Katei ka hukum, ka la trei kam mynta ha ka jylla Helmand bad la pynmih da ka sorkar Taliban jong ka jylla, ha ka nongbah Lashkar Gah, jong katei ka jylla. Ka hukum jong ki ehrang Taliban, kaba la phah sha ki dukan khap shniuh, ka long “Lada don mano mano ba pynkhein, kin shah pyn shitom da kaba tyngeh” tangba ym pat shym la iathuh satia, ia kaei ka jing pyn shitom ban pyn ngat ha kitei ki nong khap shniuh, ki ban khap ia ki tmain jong ki shynrang.

U Bilal Ahmad, uwei na ki nongshong shnong jong ka nongbah Lashkar Gah, ula kren diaw mynsiem jur, da kaba ong “Nga pait dohnud, ban iohsngew ia kaba kum katei ka hukum bad nga kyrpad ia baroh, ba kin ailad ba ngin ia im, kumba ngi ju im baroh shi katta”.

Dang ha ka sngi saitjain ba ladep, ki ehrangn Taliban, ki la pyniap ia 4ngut ki nongrahbor briew bad hadien ba ki la dep pyniaid, ki la sdien ia ki hajrong jong kawei ka kali kit mar (crane) ha ka jaka iew jong ka nongbah Herat.