Ka ain nongrep 2020

Da I MR Ranbakin Lamin Gayang

KHYNDIAT SHAPHANG KANE KA AIN KUM KA JINGLAMPHRANG :
Kane ka ain la wanrah nyngkong ia ka sha ka iing dorbar thawain(LOK SABHA) jong ka ri da ka sorkar ba synshar haka bor kata ka dei ka NDA kaba la ialam da ka party BJP , bad la mynjur iaka haka 17 tarik u September 2020 da kane ka iing.Bad ha RAJYA SABHA haka 20 tarik u September, hakajuh ka por u President ka RI ruh u la ai jingmynjur haka 27 September 2020.

Kane ka ain ka don lai tylli ki kyndon.Artylli na ki lai tylli ki dei kiba thymmai bad kawei ka dei kaba la pynkylla na kaba lah don lypa (amendment) bad kita ki long kumne harum haka ktien nongwei:
The Farmers’ Produce Trade and Commerce (Promotion and Facilitation) Act,2020
Farmers (Empowerment and Protection) Agreement on Price Assurance and Farm services Act,2020
Essential Commodities (Amendment) Act,2020.
KAEI KA JINGMUT JONG KANE KA AIN ?
Ka kyndon kaba nyngkong jong kane ka ain ka kdew ba kan wanrah ka jingpynkiew ia ki nongrep bad ban ai ha ki iaka jinglaitluid ban die ym tang ha ki ‘Mandis’ ne iew dielang lane hapoh ka jingkhmieh jong ka kumba ki khot ka ‘APMCs’, hynrei lyngba kane ka ain ka shah ruh iaki ban die shabar ki jylla ruh. Kane ka kyndon ruh ka ai jinglaitluid ia ki nongrep ban die ia ki marbam jong ki beit beit sha ki nongthied ne ki kompany.

Ka kyndon kaba ar ka kdew ba kan ai Ka jingiada iaki nongrep ha ka rukom ba ki nongdie bad ki nongthied ki hap ban soi da ka soskular, Kaba mut ba ka sorkar ka pynmih ia kane ka ain ha ka dur ba ki nongdie lane nongthied kim lah shuh ban pynkylla ia ka dor haba ki la dep iakut. Bad shuh shuh, kane ka ain kan long ka atiar ban iada na ka jingiakhajia hapdeng u nongdie bad nongthied.

Ha kane ka ain kaba lai kaba la don lypa ka Essential Commodities Act,1955 , kala don ka jingpynkylla kaba ki khot mynta ka Essential Commodities (amendment) Act,2020. Hakane ka ain ka jingpynkylla ka jong ki ka long ba ki weng noh ia ki marbam badonkam kum ki, symbai (prosbin,u dai,u rymbai, u motor bad kiwei kiwei), umphniang bam,u phan bad u piat naka jingjied ia ki marbam badonkam. Lyngba kane ka ain ka sorkar kan shim hi ia ka rai, ha kaba iadei ban pyndap bad ka dor jong kine ki marbam lada jia kano kano ka khlam ne ka thma lane jia ba kiew dor ha kano kano ka por.
BALEI BA KANE KA AIN KA PYNLONG IA KI JYLLA BAN PYRSHAH KHAMTAM EH HA KI AR TYLLI KI JYLLA KITA KIDEI KA PUNJAB BAD HARYANA?

Haba ngi phai sha kine ki ain shisien peit ngi Iohi ba ka sorkar ka la leh kaba bha tam eh naka bynta ki nongrep jong ka ri hynrei kaei pat ka jingmut jong ka sha lyndet ngim tip. Haba ngi peit kot khubor ne ha ki news channel ha kine ki bnai ba la dep bad u snem ba la lah, kane ka jingiakhih pyrshah ka dang iai bteng bad tad haduh mynta ruh.

Katkum ba la iathuh na ka khubor “Times of India” kane ka ain ka wanrah ka jingduhnong kaba khraw ia ki jylla khamtam ia ki jylla kiba shaniah khambun ka jingioh khajna na ka rep ka riang. Shuh shuh kane ka ain ka pynim tang ia ki nongrep kiba heh khamtam lei lei haba kam don shuh kata ka MSP(Minimum Support Price) kaba baroh shikatto lyngba kane ka MSP ki nongrep ki ioh jingiarap na ka sorkar bad lyngba ka jingweng noh jongki ia kane ka MSP ki nongrep kin shitom. Haba phai shuh shuh sha ka jingdie shabar ka APMC ki nongrep kiba rit kin shitom jingeh haba kin leit die shabar kin hap ban kitkhlieh hi ia ka bai leit bai wan bad kumta ter ter.

Namar kata Kaei ba ki tieng ka long ba ki kompany hi borabor ki thmu ka long ban iohnong ialade , te haba ki wan kin ioh ban khnoit katba ki mon ia ki dor jong ki mar ki mata haba peit sha kawei ka liang pat ka jingiohnong kan long tang ia ki kompany. Haba peit bha shaphang kane ka ain kaei kaba pyntieng shuh shuh ia ki nongrep kiba bun ka long ba lyngba ka soskular ba la iateh, ki kompany kin ioh ban teh lakam ia ki nongrep dakaba ai bynda ia ki ha ka rukom jong ki kor ki bor, ki iing ki sem, bad kiwei kiwei de. Nakata ka daw ki nongrep ki sngewthuh ba lyngba kine ki jingpynbiang jong ki kompany lashai lashisngi kan long ka jingeh kaba khraw iaki haba kim lah ban pynbiang. Shuh shuh, da kaba weng noh ia ki marbam kum ki symbai (prosbin, u dai, u rymbai u motor bad kiwei), u phan u piat na ka jingjied ia ki marbam ba donkam kiba dei ki marbam ba man la ki thliew iing ki donkam ia ki kan long kaba ma ha ka jingkiew dor. Namar ba haba ki kompany ki ioh ban pynlum lang ia ki shijaka ynda la dep thied khamtam kum ki mar bym pyut bad kin pyllait ia ki ha ka por ba duna ka dor jong ki shisha kan kiew.

KA JINGKYNTHOH
Bun na ki riewshemphang lane ki riewstad ki kynthoh iakane ka ain da kaba ki ong ba kane ka ain kan pynmyntoi tang ia ki kompany ne ki riewspah bad ka sorkar hi kam pyrkhat ia uba duk ba rangli.
Ki sengsainpyrthei kiba don ha ka liang pyrshah(kum ka seng congress bad kiwei kiwei) ruh ki kynthoh ia kane ka ain da kaba ong ba kumno ba ka sorkar pdeng kaba don ha ka liang synshar ka pynlong ain ia ka haba kim don hapoh ka iingdorbar thawain. Kane ka jingleh jong ka sorkar ba don ha ka bor ka long kaei kaei kaba lyngngoh bad ruh ka long kabym dei katkum ka ain.

Kumjuh ruh u myntri rangbah jong ka jylla Delhi u Arvind Kejriwal haba ai jingkren hapoh ka iing dorbar jong ki, u ruh ula kynthoh ia kane ka ain da kaba kubur ba kane ka ain kan nym wanrah ka jingkylla ia ki nongrep bad ula ong ruh ba kane ka ain kam don jingmyntoi eiei haba ianujor bad kaba mynshuwa. U kynthoh ruh ba ki myntri ka sorkar BJP kim lah ban batai khyndiat ruh haba kylli shaphang ka jingmyntoi jong kane ka ain.
KA JINGDAWA JONG KI NONGREP
Bun ki nongrep khamtam ki nongrep jong ka jylla Punjab bad Haryana ki ialeh ban dawa na ka sorkar pdeng kata ka sorkar NDA ba la lam lynti da ka sorkar BJP, ban wanrah biang ia ka MSP (Minimum Support Price) kaba long kawei ka bynta ban iada iaki na ka jingduna ka jingiohnong.
Ka long kaei kaei kaba sngewsih haba ngi pyrkhat ia ki jingleh jong ka sorkar haba iadei bad kane ka ain, khamtam lei haba ngi phai sha ka jylla jong ngi bun hi ki mar ki mata lane ki marbam mardih ngi shaniah beit na shabar, bad lada kane ka ain ka treikam shisha ngi ruh ngin sa mad kajuh ka jingeh haba iadei bad ki dor ki mur, namarba shibun hi ki longiing kiba don hapoh ka jylla bad ka ri hi baroh kawei ki dangduna ha ka jingioh jingkot. Lada jia lei ba u marbam uba ngi pyndonkam man la ka sngi un kiew dor katno tam lei kan long ka jingeh ia ngi. Ngi ruh ngin ai mynsiem ia ki nongrep jong ka ri kiba pyrshah ba kane ka ain kan nym treikam.