Ka aiñ khyndew ka sorkar pdeng kan pynduh ia ka hok longtrai, ong u riewsaid

Shillong, 23 Lber:
U bah Daniel stone Lyngdoh Nonglait u nongiasaid aiñ jong ka Supreme Court u la ong ba lada pyntreikam ia ka aiñ khyndew jong ka sorkar pdeng – ka Land Acquisition Act 2014, ha kane ka jylla kan pynduh noh ia ka hok longtrai bad long nongkynti jong ki paidbah kane ka jylla naduh ki jaitbynriew Khasi, Jaintia bad Garo.
U bah Daniel u la ong ba la pynkupbor ia ngi ban long trai ia ka khyndew ka shyiap lyngba ka IOA kaba dei ka jingiasoi soskular ha u snem 1947 hynrei ka jingwanrah jong ka sorkar NDA ia katei ka aiñ hapoh ka jingialam jong ka BJP ia ka sorkar ka la buh jingma. U la ong ruh ba ka jingthaw ka sorkar ia katei ka aiñ ban pyntreikam ha baroh kawei ka ri India, ka dei ka bym lah ban pdiang ha kane ka jylla namarba kan pyniap noh ia ka IOA. U la ong ba lada pyntreikam ia katei ka aiñ kan nym lah lait na ki jingdkoh bad ki jingduna ha kiba bun ki liang.
“Haduh mynta, ngim donkam ban registar ia ka khyndew hynrei katkum ki kyndon jong kane ka Aiñ bathymmai ka Sorkar Pdeng kin pyniap noh ia ka Instrument of Accession kaba la iasoi ha u snem 1947, ngin hap ban pyrkhat bha halor kane namar lada ka Sorkar BJP kan pyntreikam salonsar ia kane ka aiñ kan wanrah jingmynsaw ia ngi hi bad ym tang katta, wat ki Autonomous District Council kiba peit bad khmih ia ka khyndew ka shyiap bad ka riti ka dustur kin ngat lang ha ka jingshah ktah na kane ka aiñ bathymmai ka Sorkar Pdeng.” Ong u bah Daniel da kaba
kyntu ia ka Sorkar NDA ba ka dei ban pyrkhat thymmai biang da kumwei pat khnang ba kane ka aiñ kan ym ktah ia ki nongshong shnong kane ka Jylla bad ia kiwei pat ki jylla kane ka thaiñ Shatei Lam mihngi kiba hap hapoh ka khyrnit jong ka Sixth Schedule.