Ka ‘ain khang bat ar kam’ ka sorkar jylla ka la pheil, ong ka UDP

Shillong, 19 Rymphang:   Ka UDP ka la ther ia ka sorkar jylla ba ka jingpdiang ia ka ‘Ain khang bat ar kam’ ka Prevention of Disqualification (Members of Legislative Assembly, Megha laya) (Amendment) Act, 2015, ka pynshisha ba ka la pheil.
Haba kren sha ki nongthoh khubor hadien ba la wai ka jingialang ka UDP East Khasi Hills mynta ka sngi, u President thymmai ka United Democratic Party (UDP) East Khasi Hills District u Bah Titoster Well Chyne, u la ong, ba ka jingpas ka sorkar ia ka ain, ka long tang ka jingpynlut phut ia ka bor bad ka por jong ki paidbah bad kumjuh ki seng sain pyrthei.
Kane ka jingtakrain ka UDP, ka long hadien ba kane ka ain khang bat ar kam, kam pat lah satia ban treikam wat hadien ba la pdiang  naduh u Nailur, bad la rai ba kan treikam noh naduh ka 1 tarik u Risaw, 2015. Kane ka la paw hadien ba u Bah Pynshngain N Syiem uba bat ar maloi kum u MDC bad MLA, u dang neh haduh mynta, hynrei kiwei ki la iehnoh lut mar ia pdiang ia kane ka ain.
“Ka jingpas kyrkieh ia kane ka ain Prevention of Disqualification (Members of Legislative Assembly, Meghalaya) (Amendment) Act, 2015, kan dei kawei na ki mat ba ka party kan ther ha kane ka elekshon MDC shiteng samoi”, la ong u Bah Chyne bad bynrap, ka sorkar ka la pynlong thamula ia kane ka ain, kaba shu pynlut kai ia ka por bad ka bor.
Ar ngut ki MDC jong ka seng, kiba long ruh ki MLA kynthup u Bah Metbah Lyngdoh (Mai rang) bad u Bah Brolding Nongsiej (Mawthadrai shan) lem bad saw ngut kiwei ki la iehnoh ia ka jinglong MDC hadien ba ka sorkar ka la pdiang ia kane ka ain.
Ha kajuh ka por, u Bah Chyne u la ther ruh ia ka sorkar jylla kaba la pyntroin ia ka district council kumba la paw na ki kam jongka, kum ka jingpyntlot bor ia ki Rangbah Shnong bad kiwei ki kam jongka.