Ka ain khang bat ar kam, ka leh aiu ia U CEM KHADC, kylli ka UDP

Shillong, 28 Rymphang: Ka UDP ka la buh jingkylli ia ka sorkar ba ka la leh aiu ka Ain Khang Bat Ar Kam ia u CEM ka KHADC uba dang neh haduh kine ki sngi watla kiwei ki la dep iehnoh slem mar ia pdiang ia kane ka ain da ka iing dorbar thaw ain ha u Nailur mynshem snem.
“Kaei kaba jia ia u CEM ka KHADC u Bah Pynshngain N Syiem u bym la iehnoh ia ka kam MLA/MDC haba la pdiang ia ka ain Khang Bat Ar Kam. Ka sorkar ka la ong ba kan iaid sha khmat ban pyntreikam ia kane ka ain lada ka long ha kane ka dur, kaei kaba ia kito ki MDC kiba la dep iehnoh ha ka jinghukum jong u Myntri Rangbah ka jylla”, la buh jingkylli u Senior Working President ka UDP u Bah Bindo M Lanong haba kren sha ki nongthoh khubor ha kane ka sngi Saitjain hadien ba la wai ka jingialang ka party.
“Ka sorkar ka dei ban pyndonkam da u juh u diengkot  ia baroh ym ban leh shiliang”, la ong u Bah Lanong.
“Ka kam MDC kam dei ka kam ioh nong (office of profit),  bad kam don jingktah satia ha ka ain Khang Bat Ar Kam. Ka sorkar ka dei ban shim ia ka jingkitkhlieh ia ka jingphah iehnoh kam ia ki MDC”, la ong sa u Dr Don kupar Roy.
Ka UDP ka la takrain ruh ia ka sorkar ka bym la lah ban synshar ia ka jylla namar ba ka ioh ka kot ka kamai kajih jong ki paidbah, ka la hiar bym long shuh ban iakren. “La khang ia ka tih dewiong, mawshun, shyiap, pom dieng bad kiwei, kine ki la ktah jur ia ka ioh ka kot jong ki paidbah ka jylla”, la ong u Bah Bindo.
Ym tang katta, ka suk ka sain ka la phet ha kaba ki kam pyntriem ki la leh trai khlieh ha ka jylla. “Ka sorkar ka dei ban pynthikna ba ka jingsuk ka dei ban wan noh kloi”, la ong u Bah Bindo.
Ha kajuh ka por, ka UDP ka la kyntu ia ka sorkar bad ka kashari ba kin kiar na kaba tuklar ia ki kam kiba iadei bad ka riti dustur, ka kolshor, bad ka rukom im jong ki briew ha kane ka jylla, namar ba lada ki leh kumta, ka mut ba ki la pynkhein ia ka hok laitluid jong ki briew.
“Ka sorkar bad ka Kashari ka dei ban sangeh ban lushia ia ki kam riti dustur, ka rukom im jong ki briew ha kane ka jylla”, la ong u Bah Bindo, da kaba kdew ba ka jingthmu ban thaw ain ia ki Rangbah Shnong da ka sorkar jylla lyngba ka jingbthah ka kashari ka long ka bym iahap satia.