Ka ain District Council, ka long pyrshah Tirot Sing: Khlieh Nongsynshar

Shillong,16 Naitung:
Ha ka kyrwoh ba la pyllait paidbah shuwa ban rakhe ia ka lyngkhuh sngi iap ba 179 u Tirot Sing Syiem, u Chairman ki Khlieh Nongsynshar u bah John F Kharshiing u la ong ba ka ain kaba la tip kum ka ‘The Khasi Hills Autonomous District (Appointment and Succession of Chiefs and Headmen) Act 1959’ ka long pyrshah ia ki nongrim u Syiem Tirot Sing Syiemlieh bad pyrshah ia ki nongrim jong u Kiang Nongbah.
U bah John u la ong ‘Ban im ki nongrim u Tirot Sing ki MDC Khasi bad Jaintia ki dei ban pynshai bad batai paidbah ha la ki konstitwensi hakhmat ki Syiem, ki Sirdar, Lyngdoh, Wahadar,Dorbar Kur, Seng Kur khamtam ia ki kur kiba la jied bad sei ia kiba khraw ba tri hapoh ka Bri u Hynniewtrep” u la ong ba ki dei ban pynshai paidbah ia ka jingthmu jong katei ka ain.
U bah John u la kynnoh ruh ba ha kine ki sngi ka la don ka jingleh donbor na ki bor Synshar KHADC kat haduh ba la knieh noh ia ka bor laitluid jogn ki Seng Kur, Dorbar Kur, ki dorbar Shnong,Raid bad Dorbar Hima. “Ngi kyntu jur ia ki Member District Council (MDC) jong ka Khasi bad Jaintia Hills Autonomous District Council ba kin pynkylla khasi bad pynshai bad batai ha la ki MDC Constituency hakhmat Ki Syiem, Sirdar, Lyngdoh, Wahadadar, Dorbar Kur, Seng Kur khamtam ki kur kiba jied bad sei ia ki bakhraw batri hapoh ka Bri Hynniewtrep ia ka jingthmu jong ka Ain The Khasi Hills Autonomous District (Appointment and Succession of Chiefs and Headmen) Act 1959, bad ngi kloi ban leit pynshai ia kino kino ki Kur kiba kwah jingshai ha kaba iadei bad katei ka ain kaba la pynhiar dor ia ka bri hynniewtrep, hakhmat ki bor synshar nongwei” ong ka kyrwoh na u bah John.