Shillong: Ka Syngkhong Rympei Thymmai (SRT) ka kynhun kaba kyrshan ban ai jait kpa, ha ka kyrwoh khubor ka la ong ba ka lynti jong ka jingai jait kpa ka dei ka lynti ka ban nang pynkhlaiñ bad nang pynskhem ia ka jaitbynriew. Ka kyrwoh na General Secretary Lascretice Lyngdoh ka la ong ba ka jingai jait kpa kan wanrah ia ka jingiatylli ha ki ing ki sem, ki shnong ki thaw bad ka jaitbynriew baroh kawei. Ka kyrwoh ka la ong ba ka ai jait kpa ka lah ban iada ialade na ki jingshah shim kabu ha ki ongwei, ki jingshah thombor, ka jingshong kha khleh, ka jingwan ryng kyrthep u mynder, ka Benami bad kiwei kiwei.
Ka SRT ka la ong ba ka jaitbynriew ai jait kmie ka dei kaba tlot bad kam lah ban iada na ki jingma kiba wan jia na ka por sha ka por, ki aiñ ki tlot haba tlot ka jaitbynriew bad kan poi ka por ba ka jaitbynriew Khasi kan sa jah noh bad haba jah ka jaitbynriew jah ka dustur, ong katei ka kyrwoh khubor. Ka la kynnoh ruh ba ka jingkren u CEM ka KHADC u bah H.S Shylla ha madan Student ha ka 3 tarik mynta u bnai ki dei ki jingkren kiba khlem da pynshong nongrim bha.