Ka Act East policy ka jingkieng ia ki Dong Mihngi bad ki ri marjan, ong u Lat

Shillong, 9 Nailar:
U Lat ka jylla Meghalaya u V. Shanmu-ganathan mynta ka sngi, u la ong ba ka Act East Policy ka sorkar pdeng ka long kum ka jingkieng ban iasoh ia ka Dong Mihngi bad ki ri ba marjan jongka.
Haba plié ia ka jingiathir halor ka “Act East bad ka Dong Mihngi ka India: Kumno ban rep ia ka jingmyntoi” ba pyn-long da ka ASEAN Study Centre (ASC) bad ka Indian Council of Social Science Research (ICSSR) – North East Regional Centre (NERC), ha NEHU, Shillong hynne ka sngi u Lat u ong ba ka Dong Mihngi ka don ka spah kaba rben bha ban leh eiei na ka bynta ka India lyngba ka “Act East” namar ka jinglong ki jaka bad ki ri ba marjan jong ka Asia ba shathie bad ruh ban wanrah ia ka jingiajan lyngba ka jingriew spah ka kolshor.
U la ong ba ka India bad ki ri Asia ba shathie ki la iakynduh jingeh bha ha ka por ba synshar ki Phareng bad ka jingpyn-khie im ia ka khaïi pateng hapdeng ka India bad ka Asia ba shathie kan kyn-tiew khlem pep ia ka ioh ka kot.
Ki ri Asia ba shathie bad ka India lyngba ka Dong Mihngi ki don ka lad ban pyniaid ban khaïi ha ka rep ka riang, ki mar ki mata bad ki bording nalor bun kiwei pat. U la ban jur ia ka jingdonkam ban don ka surok kaba bha ha ki jylla ka Dong Mihngi ban pyniasoh bad ki ri Asia ba shathie khnang ban pynkhlaiñ ia ka thaiñ.
Ha kane ka jingiathir, la don lang u Rajiv K. Bhatia, u Ambassador, Prof. S. K. Srivastava, Vice Chancellor, NEHU bad u Chairman, ICSSR-NERC, Prof. L. S. Gassah, Honorary Director, ICSSR-NERC, Dr. Gulshan Sharma, Director General, International Chamber of Service Industry, ki nongmihkhmat na ki ri Asia ba shathie, nalor ki samla pule bad kiwei.
Kham hadien u Lat ka jylla u pynlait ruh ia ka kot “Constraints & Challenges to Social Science Research in North East India” ba la thoh da u Prof. L. S. Gassah bad u Dr. C. J. Thomas.