Ka 14 tarik, kan dei ka sngi ‘Kdup Masi’, ong ka AWB

Shillong:Ka Animal Welfare Board (AWB) ka Sorkar India ka la pynmih ka jingpyn bna ba kyrpad ïa ki paidbah ban rakhe ïa ka sngi Kdup Masi ne ka “Cow Hug Day” ha ka 14 tarik mynta u bnai bad ban pyn phriang ïa ka bor kaba dei ne ka “positive energy” bad ban pyn shlur ïa ka jingïakmen lang ne ka “collective happiness”, ong ki heh Sorkar ha ka sngi Balang.

Ïa ka Valentine’s Day la rakhe ha ka 14 tarik manla u snem.
“Baroh ki riew ieid Masi ki lah ban rakhe ïa ka 14 tarik mynta u bnai kum ka sngi Kdup Masi ne Cow Hug Day da kaba buh ha ka jingmut ïa ka jingdonkam ka kmie Masi bad ban pynlong ïa ka jingim kaba kmen bad kaba dap pura da ka bor kaba bha ne kaba dei,” ong ka jingpynbna ba la pynmih da ka board hapoh ka tnat jong ka Animal Husbandry and Dairying.

Ka jingpynbna ka ong shuh shuh ba da kaba Kdup ïa ka Masi kan wanrah ïa ka jingsngew riewspah ne “emotional richness” bad kan kyntiew ïa ka jingkmen kaba shimet bad kaba lum lang ne “individual and collective happiness”.

Ka la pynpaw ruh ba ki jingleh ki longshwa manshwa ki la jan poi sha ka kyrdan jong ka jingduh jait na ka daw ka jingïaid shaphrang ki jingleh ki nong sepngi ne West culture” bad ba ka jingnang jingtip ki nong West ne ka western civilisation ka la pynlong ïa ka kolshor ha ka met bad ki jinghiar pateng kiba la jan klet.