Jyllei ki trok kit rnga, na surok Mawmaram-Lad Umsaw

Nongpoh, 26 Nailar:
Da kaba sngewkhia halor ka jingjot jingpra jong ka surok kaba naduh Mawmaram ter ter haduh Lad Umsaw, tang namar ka jingioh ban iaid laitluid da ki trok kiba kit beain ia u Dewiong bad rnga, hynnin ka sngi ki nongialam shnong ha katei ka thain ba pyndonkam ia katei ka surok, ki la pynlong ia ka jingialang ha iing Durbar Hall Umbir, Ri Bhoi District.
Ha kane ka jingialang kaba la wan ban iashim bynta da u Dr. C Lyngdoh, MLA ka Umsning Constituency, ha ryngkat ka jingiadon lang ki nongialam shnong jong katei ka thain ba kynthup ia u Bah P. Kharbudnah, rangbah shnong ka Mawlyndep, u Bah Shanding Syiemlieh, rangbah shnong Umbir, u Bah E. Lyngdoh rangbah shnong Umniuh, u Bah D. Pale, secretary shnong Umsawlum, u Bah R. Mylliemumlong rangbah shnong Umraleng, u Bah Phrangson rangbah shnong Mairung lem bad u president ka Lad Umsaw Taxi Driver Assosiation.
Ka daw kaba la pynlong ia kitei ki nongialam shnong ha katei ka thain ba kin pynlong jingialang ne ban thaw ia ka Joint Action Committee (JAC), ka long hadien ba dang ha ki bnai ba ladep la lap ba da ki phew tylli ki trok kiba kit dewiong ne rnga, kiba wan ban rung na Mawmaram bad mih lyngba sha Lad Umsaw, ha kaba hapdeng ka shimiet da ki phew tylli ki trok kiba la kit khia ki iaid lyngba jong katei ka surok, kaba wanrah ruh ia ka jingjot jingpra kloi jong katei ka surok.
Ka JAC jong kitei ki 6 shnong, ka la pynpaw ruh ba wat lada ka tnat PWD ka shimkhia ban maramot ia katei ka surok, hynrei namar ka jingbun jong ki trok kit dewiong bad rnga, kumta namar ka jingniom da kine ki trok kiba kit khia ne (Overload), ka pynjot noh ia katei ka surok.
Kumta haba iadei bad kane na ka liang ka JAC, ka la maham ia ki kali ba kit dewiong bad rnga ba kim dei shuh ban iaid lyngba jong katei ka surok naduh ka 30 tarik mynta u bnai, namar wat ka jingkit ne shalan ia kitei ki mar ia mynta ka dang long kaba beain bad lada dang lap nangne shakhmat ba dang don kiba leh pyrshah, ka JAC hi kan kem bad aiti beit sha ki bor jong ka Ain.
Ha kajuh ka por ka JAC, ka la rai ruh ban buh da ki Volunteer ha baroh ki shnong bad haba iadei bad kane ka jingjot jong katei ka surok, kaba la wanrah ruh ia ka jingeh kaba khraw ia ki paidbah ha katei ka thain, na ka liang ka JAC ha ryngkat ka jingsynranlang u Dr. C Lyngdoh, ka la rai ruh ban leit iakynduh ia u DC ka Ri Bhoi bad DC ka East Khasi Hills.