Jyllei ki khynnah rit ba niah kali

Shillong, 17 Jylliew:
Da ka jingsngew khia halor ka jingkiew kynsan ki nongniah bike kata da ki khynnah ki ba ym pat dei rta, ka Shillong Traffic Police ka la pynlong ia ka “special drive” ha baroh shi taiew. Na katei ka jingpyrshang, ki pulit ki la ioh kem bad register haduh 261 tylli ki case bad 19 tylli na ki ki dei jong ki khynnah shynrang kiba ym pat ia hap ka rta ban niah kali lane niah bike ha surok, 17 tylli ki case kiba ia dei bad ka jingbym biang laisen. Ha kaba ia dei bad ki case jong ki khynnah ki ba ym pat ia hap rta, ia ki kmie ki kpa ruh la phah wan hajir ha thanat ryngkat bad ka kuna.
Ka pisa ba la ioh lum ka kuna ka la kot sha ka T. 89,500/- kynthup kiwei pat ki kuna halor kiwei pat ki jingpynkhein. Ha kaba ia dei bad kane, ka tnad pulit ka maham ia ki trai kali kiba ai lad ban niah kali da ki khynnah ki ba ym pat kot rta ia ka 18 snem, kin hap hapoh ka jingpynshitom ka ain katkum ka U/S 180 Motor Vehicle Act, 1988 bad lah ruh ban shah set phatok lai bnai ryngkat ka kuna kaba 1000 tyngka. U no u no u ba dang ioh tang ia ka Learner license u dei ban don lang da uno uno u wei pat u nongniah kali uba la biang ka laisen. Kane ka long katkum na u Bah M.Kharkrang, IPS, Superintendent of Police-East Khasi Hills, Shillong.