“Jyllei ki bar Jylla ba trei pahara”

Nongpoh, 22 Jylliew:
Ka Federation of Khasi Jaintia & Garo People (FKJGP), North Khasi Hills District, lyngba u Bah Eddie G Kharbani, President jong ka, u la ong ba ka seng ka sngewlyng ngoh ia ka jingiohlad ki Agency bapher bapher ban thung kam ia ki Security Guard, kiba dei da ki bar jylla suda ha man la ki jaka kum ha ki Industrial Area, ha Byrnihat bad Umiam bad ha kiwei ki ophis treikam.
U Bah Kharbani, haba iakren bad u nongthoh khubor mynta ka janmiet, u la pynpaw ba ka jingiohkam ki Security Guard bar jylla ban ap khyrdop, ia kaba la thung da ki Agency bar jylla ka long ka jingma kaba khraw ia ka ri bad ka jaidbynriew, namar kine ki Security Guard ki wan ban trei ban ktah ha kane ka jylla, lem bad ki kurim bad ki khun ki kti jong ki, ki la sdang wat ban iohlad ban buhai shnong ruh, kaba mynta kine ki jaidbynriew ki la sdang ban jyllei bha ha kane ka Ri-Bhoi bad wat ha ka Ri Lum Khasi ruh.
Kumta ka seng ka pyrshah ia kane ka jingthung kam ki Agency ia ki bar jylla, kaba long ka jingma kaba khraw ia ki longdien ban sa wan.
U la ong ruh balei kim thung da ki Home Guard jong ka jylla, kiba kine ki Home Guard kiba dei ki trai jylla bun na ki kim don satia ia ka kam ka jam kaba biang. Ha ka jingshisha, ki Agency ki la dei ban khot aplikeshon ia ki Home Guard kiba ym pat iohkam.
Ha kaba iadei bad kane, na ka liang ka FKJGP, ka dawa na ki Agency ba ki dei ban pynrung kam nangne shakhmat da ki Home Guard ka jylla bad weng noh ruh ia ki Security Guard bar jylla, khnang ba ki briew kane ka jylla kin ioh ban rung kam ha ki Industrial Area bad ha ki tnat ophis sorkar ba dei ban buh ia ki, ka ban long ka jingmyntoi ia ki Home Guard ka jylla kiba la pyndep ia ka training, u la pynkut.