Jyllei ka shah tuh ATM ha ka jylla, shah rat sa ka ATM na Sohra

Shillong, 13 Risaw:
Ka jingshah tuh ki ATM ha kine ki sngi ka la nang jyllei shi jyllei katba nangmih ki sngi ha kaba dang khyndiat bnai mynshuwa ki runar ki la rat ia kawei ka ATM kaba don ha Madanrting bad nangta pat dang katto katne taiew kawei ka ATM jong ka State Bank of India kaba don ha Mylliem ka la shah rat bad shah bret syndon ha kawei ka wah kaba don marjan bad ka jaka ba katei ka ATM ka don. Mynta pat sa kawei ka ATM jong ka SBI kaba don ha Sait sohpen, Sohra ka la shah rat mynta ka step ha ka por 1:00 eiei mynstep, katei ka ATM ka dei kaba don ha phyllaw ka M/S Morland Sootinck Service Station, Saitsohpen, Sohra ( Petrol Pump).
Katkum ka khubor na ki pulit ki la ong ba ia katei ka kam la leh da ki runar kiba kim lah ban ithuh satia kiba la wan da ar tylli ki kali kawei ka Tata Innova bad kawei pat ka Tata Indigo bad ki la kit ia katei ka mashin ATM hapoh kitei ki kali. Hadien ba la ioh jingtip ki pulit ki la iathuh ba u O/C ka Sohra ryngkat ka kynhun jong u ki la kthong ia katei ka kali bad ki la ioh bat ia ka Tata Innova kaba don ia u nombar AS-01BJ-0042 na 7 mer Upper Shillong bad hapoh katei ka kali ki don saw ngut ki briew kiba la tip kyrteng kum u Hanis Ali, 27 snem karta, u Bipul Pal, 1 snem karta , u Mukut Ali, 26 snem karta bad u Sareswar Kakoti , 40 snem karta bad na katei ka kali ki pulit ki la ioh kurup ruh ia ka ATM mashin kaba la shah tuh. Kawei pat ka kali Tata Indigo ka la ioh ban phet krad.
Ki pulit ki la ong ba la lah ban kthong bad kem ia katei ka kali dei lyngba ka jinglah u paidbah ban ai jingtip ha ka por kaba biang khamtam eh ka jingiatreilang ki nongshng shnong ka Lad Mawphlang, Mawkdok bad Mawjrong. Ha katei ka por ba ki pulit ki la io hkem la ong ba ki runar kim pat lah ban khyllie ia katei ka mashin hynrei ki ophisar ka SBI ki la iathuh ba hapoh katei ka mashin ka don ka pisa kaba haduh T.20 lak tyngka tam. La ong ruh ba ki dei ki juh kitei ki runar kiba donkti ban tuh ATM na Mawlai ha kip or kiba la leit. Hadien ba la tip ia katei ka jingjia ka tnad pulit ka la phah jingtip sha baroh ki district ba kin long husiar bah na ka jingshah tuh ATM bad kumjuh ruh mynta ka step ki pulit ki la lap ia kawei ka kali kaba khlem trai ba la pynieng ha Moodymmai, West Jaintia Hills.