Jwat ka jingiakhih pynkhyllem, ia u Dr Mukul Lah ban shah sloit shuki ki myntri

Shillong, 20 Naitung:
Ka jingiakhih jong ki MLA ban pynkhyllem nongialam ia u Myntri Rangbah u Dr Mukul Sangma ka la jwat bha. Ha ka jingshisha, ka jingiakhih ka jingbym sngew hun ia ka jingtrei kam jong u ka la sdang la katto katne bnai myn shwa.
Katkum ka khubor, kane ka jingjwat ka dei namar ba kiba thmu ban pynkhyllem ia u Dr Mukul kum u nongialam ka Congress Legislature Party (CLP) kim pat ioh ia ka jingbun paid ha ka liang jongki namar ba u Dr Mukul u dang lah ban bat khambun sha ka liang jongu.
Namar ka jingshem jingeh ban pynkhyllem, mynta ki MLA ka Congress ki la rai ban pan jingiarap noh na u MP ka Shillong Bah Vincent H Pala ba un leit iatied jingkhang sha ka AICC halor kane ka kam bujli nongialam ha ka party ha kane ka jylla kaba ju khih man ka por ka kam nongialam.
Ki nongialam ka Congress na kane ka jylla ki la leit sha Delhi ban pyniakren ia ki heh ka AICC halor kane ka kam. Katkum ka jingtip u president ka MPCC, Bah DD Lapang, ki myntri ba kham rangbah kynthup Bah HDR Lyngdoh, Bah Prestone Tynsong ki la leit sha Delhi ban thaw buit ban pynhiar shuki noh ia u Dr Mukul, watla kine la ong ba kin leit synran ia u Dr Mukul ban kynduh ia ki heh ka Planning Commission.
La iathuh ba u Myntri Rangbah mynta u la don ha ka jingthmu ban bujli myntri sorkar noh khamtam kito kiba ialeh pyrshah ia u kiba don ha ka shuki bad un sa ai shuki pat ia kiwei kiba kohnguh ia u.