Jurip Umshyngiar u Bah Process

Shillong, 5 K’lyngkot:
U Bah Process T Sawkmie MLA barim ka Mawlai, u jurip dang shen ia ka jaka tong um, jaka saitjaiñ bad ka jaka sait snier jong ka shnong Mawlai Mawdatbaki ba don ha ka dong Umjan.
Ia u Bah Process la synran da u Rangbah Shnong Bah BR Kharmujai, ki riew rangbah, ki Longkmie, ki samla jong ka shnong bad ki Nongkitkam jong ka Mawlai Peoples Development Forum (MPDF).
Na ka liang u Bah Process ula pynpaw ia ka jinglyngngoh halor ka jingsahteng jong ka project sam um ba 1.18 klur tyngka, kaba la mang ban pyntan umbam umdih sha baroh ki Longiing ba don ha ki kyntoit bapher bapher jong ka shnong Mawdatbaki. Ia kane ka project la pynioh da u Bah Process na ka tnad PHE naduh u snem 2007-2008, kaba la mang beit thik tang ia ka Mawdatbaki.
Ha kane ka jingjurip, ki nongsait snier, ki nongsaitjain, kila pynpaw hakhmat u Bah Process iala ki jong ki jingeh ba ki iakynduh ha ka trei ka ktah bad na ka liang une u MLA barim ula kular ban sa kner ia ki kti ka jingiarap sha ki.