Jurip u MLA lem bad ki ophisar ia ka shnong ka ban sa pdiang jingiaseng Synod

Nongpoh: Myn hynnin ka sngi, u Bah Mayrald Born Syiem, MLA Nongpoh ha ryngkat ki ophisar sorkar, kiba kynthup naduh ka tnat PWD, PHE, MeECL bad tnat pule puthi, ki la leit sha ka shnong Umjari, kaba don ha ka thain Umden kaba dei ruh ka shnong ka ban sa pdiang ia ka Jingiaseng Synod Rangbah ka Ri Bhoi Presbyterian Synod ka ban sa long mynta hi u Bnai.

Lyngba katei ka sngi, kaba utei u MLA u la hiar sha katei ka shnong, u la lah ruh ban plie paidbah ia ki skim pynroi kiba u la pynioh sha katei ka shnong, kata ia artylli ki kamra Klas ka Umjari Mathan Govt LP School bad ruh ia ka Iing Dorbar jong katei ka.
Lah ruh ban kdew hangne, ba ka shnong Umjari Mathan, ka dei kawei na ki shnong nongkyndong ha Ri Bhoi, hynrei mynta u snem ka la ioh ban pdiang ia ka Jingiaseng Synod Rangbah ka RBP, kumta shwa ban pdiang ia katei ka Jingiaseng heh, u MLA ka Nongpoh, u la ialam ia kitei ki ophisar sorkar, khnang ba kin ioh ban pynshai sha ki paidbah ka shnong, halor ba kumno yn nanglah ban pyniaid ia ki kam.

Ka jingialam u MLA ia kitei ki ophisar sha katei ka shnong, ka dei lehse ba kin pynshai sha ki paidbah jong katei ka shnong halor ka jingpyntrei ia ki skim sorkar kaba la pynmang kyrpang ia katei ka shnong ha ka jingpynkhreh jong ka ban pdiang ia ka Jingiaseng Synod.