Nongpoh: Ha ka sngi Thohdieng ka Taiew, u Dasakhiatbha Lamare, MLA ka Mawhati Constituency, u la mih shakhmat leit ban jurip ia kiba bun tylli ki Quarantine Centre kiba don ha ki shnong ka thain Mawhati, kata ha ka Shnong Umwieh snieh, Shilliang Umdoh, Mawhati Pdeng, Jatah, Lumniwar, Laitsyiar, Umsohlait bad Sonidan.
Ha katei ka sngi kaba utei u MLA u la leit ban jurip ia kitei ki Quarantine Centre, la don ryngkat da ki Rangbah Shnong bad ki Community Covid-19 Management Committee, ki Asha bad Anganwadi, Head Master ka St Vianney Sec School lem bad kiwei de, kumta lyngba katei ka jingleit jurip, utei u MLA u la ai ruh ia ka jingiarap lyngba ka pisa, ki jingda khmat, ki Hand Sanitizer, Hand Gloves lem bad kiwei kiwei de ki tiar donkam.
Haba kren ha katei ka sngi, u Dasakhiatbha Lamare, u la ong, ba katei ka jingleit jurip ka jong u, ka long ban tip ia ka jingeh kaba la kynduh da ki nongialam shnong bad khamtam kito ki shnong kiba don ia ki Quarantine Centre, namar ki don ki shnong kiba shem jynjar ban pynbit pynbiang na bynta kito ki samla kiba shong ha ki Quarantine Centre.
U la ai ruh ia ka jingiaroh ia ki nongkitkam ka Community Covid-19 Management Committee, kumjuh ruh ia ki nongialam shnong namar ka jingtreishitom jong ban peit ban khmieh ia la ki para nongshong shnong bad khamtam eh ia kito kiba dang shu wan nabar ka jylla.
Phi don ban ong eiei?