Nongstoiñ: Ka jingther kaba kynsan jong u phria ha ka 30 bad 31 tarik u Risaw ha ki katto katne ki bynta jong ka West Khasi Hills District, ka la pynlong ia ki nongrep ban jaw um mat kthang namar ba kiba bun ki kba ha ki pynthor ki la julor lut bad ki sah bad ieng sa tang ki jyntang kba suda.
U MLA ka Nongstoiñ katba u dang ia phylliew jingmut bad ki nongrep hadein bala dep ban jurip ia ka pynthor kba ha ka thaiñ Umyiap.
Ha kaba iadei bad katei ka jingshah pynjulor jong ki kba bad ki jingthung jingtep na ka liang jong u MLA ka Nongstoiñ u Bah Macmillan Byrsat ha ryngkat ka jingsynran lang jong u General Secretary ka NPP u Bah A.L. Syiem myn hynnin ka sngi ki la hiar ban jurip ia ki lyngkha kba hapoh ka thaiñ Umyiap kiba la shah ktah ha ka jinglynshop jong u phria
U MLA ka thaiñ u la ioh ruh ban ia kynduh bad ban ia phylliew jingmut bad ki nongrep jong ka thaiñ Mawsngapwir, Mawiawet, Nongrangoi bad Mawkynbat kiba la shah ktah ha katei ka jinglynshop jongu phria bad ha katei ka jingjurip u MLA u la lap shisha ba haduh kumba 90% eiei ki jingthung jingtep ki la julor lut.
Shuh shuh ha katei ka jingia phylliew jingmut bad kitei ki nongrep ha katei ka sngi u MLA u la pynpaw ia ka jingsngewsih kaba khraw ha kaba iadei bad ka jingshem lanot jong kitei ki nongrep katei ka thaiñ kaba kila mad ia katei ka jingshah lynshop ia ki jingthung jingtep jong ki kaba ju ai bam ai sa ia ki man la u snem.
U la iathuh ruh ia ki nongrep ba na ka liang jong u kum u nongmih khmat u la dep ban bthah ia u Deputy Commissioner ka West Khasi Hills, ia ki BDO jong ka Nongstoiñ bad Mawthadraishan ban jurip ia kitei ki pynthor kba kiba la shah ktah ha kaba yn da kila ioh ban lum ban lang kin sap hah ia kitei ki kyrteng ha kaba na ka kang jong u MLA un sa buddien bad ba baroh ki nongrep kiba shah ktah kin ioh iala ka jong ka hok.
U Bah Rangsing Wahlang Sordar shnong jong ka Mawiawet u la buh ka jingkyrpad na ka bynta u MLA ba un shimkhia ha kaba iadei bad katei ka jingjia bad u la iathuh ruh ba ha ki snem kiba la dep lada wan jia ki jinglynshop ka mei mariang, ki longing longsem ki ioh ia ki jingiarap hadien 2 bad 3 snem haduh ba kiba bun ki longing kim kynmaw shuh ia kaba la jia, bad ba kum kitei ki jingjia kim kwah satia ban dang bteng.
U MLA hadien ba u la iohsngew ia kitei ki jingud na u sordar shnong u la kular skhem ha khmat jong ki nongshong shnong ba ki Gramsevak jong kitei ki ar tylli ki Block kila leh iala ka jong ka bynta ban lum ban lang ia ki jingtip kiba bniah bad na ka liang jong u MLA u la kular skhem ban pynstet ban pynioh ia ki lad jingiarapa sha baroh ki longing kiba la shah ktah ha katei ka jinglynshop jong u phria.
U General Secretary ka NPP u bah Apsharai lang Syiem haba kren ha katei ka jingialang u la iathuh ba ka thaiñ Umyiap kala mad arsien kynthih tang ha u ne u snem ha kaba ha ki bnai Iaiong, Jymmang katei ka thaiñ kala shah lynshop ha u phria ha kaba ki longing ki la shah lynshop jur ha u phria bad watla katta ruh na ka liang ka sorkar da ka jingtrei shitom u MLA la ioh ban ai ia ki jingiarap tang ha ki por ba khyndiat eh bad kan long kumjuh na ka bynta kane ka jingjia kaba la jia mynta.
Katkum ka kaiphod na u BDO ka Nongstoin C&RD Block la ong ba ki shnong ki ba la shah lynshop tyngeh ha utei u phria ki kynthup ia ka shnong Mawsngapwir, Mawkynbat, Mawiawet, Nongrangoi, hynrei ha ki thain Lai lyngdoh pat ka shnong Jaidoh, Nonglwai, Byrki kidei ki shnong kiba la shah lynshop bad shah pynjulor ha u phria.
Ha kawei pat ka bynta na ka liang jong u MDC ka Nongstoiñ ruh u bah L.G Nongsiej ha kaba iadei bad katei ka bynta u la leit ban ia kynduh ia u Deputy Commissioner ka WKHD u bah T. Lyngwa bad ha katei ka jingiakynduh u DC u la iathuh ba u la dep ban bthah ia ki ophisar ba dei peit ba kin phah noh ia ka kaiphod mynta ka taiew khnang ba u DC un ioh pat ban phah Sha ka sorkar ha u taiew ban wan khnang ban pynstet ban pynpoi ia ki lad jingiarap sha kiba shah ktah.