Jurip u MDC ka Mawlai ba jaboh ka Umsohlang

Shillong, 2 Naitung:
U MDC ka Mawlai Constituency Bah PT Saw kmie mynta ka sngi Ba lang, ula jurip ia ka Um shing Umsohlang Water Supply Scheme ryngkat ki ophisar ka PHE namar ka jingud ki Nongshong shnong ka Mawlai Pyllun ba ka la jaboh palat.
Kane ka um la sam na ka tyllong ka Public Health Engineering.
Ia u Bah Process la synran da ki Rangbah Shnong, ki Nongkitkam Shnong, ki Seng Longkmie bad ki Seng Samla jong ki kyntoit bapher bapher ka Mawlai ha ka jingiadon ryngkat ki Engineer ka Tnad PHE ba kynthup ia i Executive Engineer ka Tnad Inbestigation, Executive Enginneer ka Greater Shillong Water Supply Scheme bad kumjuh ruh u SDO Electrical Bah KS Kurbah.
Shwa ban jurip, u Bah Process ula shong jingialang bad ki Engineer ka PHE ha ryngkat ki Nongkitkam shnong ha kaba ula pan ia ka jingiatreilang jong ki Engineer bad ban don ka jingiatreikam ba iajan bad u khnang ban lah pynbit pynbiang ia ka jing bdonkam jong ki nongshongshnong ka Mawlai. Ula kyntu ruh ia ki Engineer ba kin khmih bad shimkhia bha ia ka jingeh jong ki nong Mawlai da kaba ai ka jingshakri kaba hok bad ba pura lyngba kane ka Water Supply Scheme. Ula pynpaw ruh ia ka jingdon kam ban pynthymmai noh ia ki kor ki bor ha kane ka Tyllong um khnang ba ka jingsam um kan nym don jingthut.
Une u MDC ula pynpaw ruh ba ki Engineer ki dei ban shimkhia lang noh ha kaban pyntreikam shaid shaid ia ka Mawdatbaki Deep Tube Well bad kumjuh ruh ia ka Mawiong Water Supply Scheme, ban dup lah weng ia ka jingeh na ka jingkyrduh um ha kine ki shnong.
Haba pynpaw ia ka jingbynniaw halor ka jingnang ringswai ka jingshakri jong ka Umsohlang Water Supply Scheme, u Bah Process ula pynkynmaw ba shisien ka por, ka Umsohlang ka dei kawei ka tyllong um kaba lah ban pynpoi umbam sha ki thiew iing hynrei mynta kane ka tyllong um kam shym la lah shuh ban ai ia kane ka jingshakri. Namar kane, ula kdew ia ka jingdonkam ban pynkhuid bad nang pynheh ia ka Dam ba tan um, khnang ba kan lah ban wanrah biang ia ka jingpahuh um ha Mawlai.
Kiwei pat kiba la kren ha kane ka jingialang ki kynthup ia u Rangbah Shnong ka Mawlai Mawdatbaki BahBR Kharmujai, u Rangbah Shnong ka Kynton Massar bad kiwei kiwei.