Jurip u CEM, ia ka iewduh; ba jyllei ki bar jylla ba khlem laisen

Shillong:U Chief Executive Member (CEM) jong ka Khasi Hills Autonomous District Council (KHADC), u bah Titostarwell Chyne, ha ka sngi palei ka 20 tarik iaiong, u la leit hiar sha iewduh ban leit jngoh ia ka iewduh.

Haba iakren bad ki lad pathai khubor, u bah Titostar well Chyne,u la iathuh ruh ba ka long kaba isaitmet ban iohi ia ka jing don jong ki briew kiba nabar kiba die madan, ha u pud u sam jong ka Iewduh khlem ki kot ki sla kiba biang, ha kaba na ka liang ka jong u ha kane ka sngi, u la ialam lang ia ki pulit enforcement jong ka konsil ban beh noh ia kine ki briew, namar ki dei tang ki nong shong madan ki bym don satia ia ki kot ki sla kiba biangbad ki bym don ia ka trading license ruh.

Naka liang jong u CEM, u la iathuh ba u la bthah ia ki nongtrei ki jong u, ba kin pyntikna ba kine ki briew kiba la dep ban beh kim dei satia ban shong biang ha ka juh ka jaka.
U bah Chyne, u la iathuh ruh ba nangne shakhmat ka jing khynra kan long na ka por sha ka por, ym tang ia kiba shong die madan, hynrei wat ia kiba don ha ki dukan ruh namar la lap ba ki don katto katne ki dukan, ki bym don satia ia ki kot ki sla kiba biang.

U bah Titostarwell Chyne, u la pynpaw ruh ba mynta ka sngi kim pat lah satia ban khang ia ki dukan ki bym don ia ki kot ki sla, hynrei ki don pat ki kyndon kiba ki hap ban bud, ban ai shwa ka showcase ha shwa ban khang khyrdep noh lut ia kito ki dukan kiba ki lap ba kim don ia ka trading license.
Haba iadei bad ka jingbun jong ki briew ba nabar ki ba shong die madan ha iewduh, khlem ki kot ki sla kiba biang, na ka liang jong u bah Titostarwell Chyne,u la iathu ba baroh ki hap ban shimlang ka jing kitkhlieh, ka Hima Mylliem, ki myntri bad ka tnat enforcement jong ka konsil ruh kumjuh.

U CEM, u la iathuh ruh ba na ka liang jong ka Executive Committee ka jong ki, ruh kin pyntikna ba ki enforcement ki dei ban treihok, ym ban shu kmen tangba lah ioh kam lah biang, hynrei ki dei ban treikam hok ia ki Enforcement, khnang ba ki briew ba nabar kin ym iohlad ban khaïi ha kane ka ri jongngi, khlem ka trading license.

U bah Titostarwell Chyne, u la pynshai ruh ba na ka liang jong ka Executive Committee, kam kwah pat ba baroh ki briew ba nabar kin ioh lut ia ki trading license, hynrei ka jingmut ka long ban pynduna.
U la ong ruh ba ka long kaba beaiñ ia ki briew ba nabar ban wan khaïi khlem ka trading laisen bad na ka liang jong u ha ryngkat u EM ba dei peit ia ka Trade kin pyntikna ba kine ki briew ba wan khaïi khlem ki trading license, ki dei ban duh ruh ia ka laisen, namar ba ki la dep ban pynkheiñ lypa ia ka aiñ.
Na ka liang jong u CEM, u la iathuh ruh ba nangne shakhmat ka tnat enforcement jong ka konsil, hi kan khynra noh na ka por sha ka por ia kito ki bar jylla kiba khaïi khlem ki kot ki sla kiba biang, namar ba ki la jyllei palat.
Ha kane ka jingleit jngoh ia ka iewduh u CEM jong ka KHADC, u la pynpaw ruh ia ka jing sngewtynnad pat ban iohi ba ha ki por ki ba la dep bun na ki kyndong kynshrot bad ki katto katne ki jaka la shong beit da ki briew kiba nabar hynrei mynta ka kynti la iohi pat da ki briew ki jong ngi u la iathuh.
Ha kane ka jingleit jong u CEM sha Iewduh, u la ioh ruh ban leit jngoh ia ka jing pyntrei ia ka jingtei ha iew dielang kaba dei na bynta jong ki nongrep, ha kaba u la iathuh ruh ba ka jingpyntrei ka la iaid shait shait, ha kaba la ioh ruh ban iakren bad u nongpyntrei ia katei ka jingtei ba la kumno kumno hapoh u bnai jymmang, yn sa lah ban pyndep noh.
U la ong ruh kane ka jingtei kan dei ka jingkyrkhu ia ki paidbah nongrep ki jong ngi kiba juh shah ha ka sngi u slap, hynrei ki la ioh ia kane ka ïing, ha kaba na ka liang jong ka konsil ruh lada ka don ka lad ka lynti kin sa peit ba kummo yn bteng shuh ia ka jingtei, namar mynta la tei tang ia ka mala ba nyngkong.
Ha ka jingleit jong u CEM ia ka iewduh la synranlang da u Syiem ka Hima Mylliem,u paiem Ainam Manik Syiem, ki EM jong ka KHADC, ki myntri ka Hima Mylliem, lem bad ki Enforcement jong ka KHADC.