Jurip ki heh ka MSPCB ia ki Karkhana ha Byrnihat, shah khang 6 tylli ba pynmih tdem jaboh

Nongpoh, 05 K’lyngkot: Ki heh ophisar jong ka Meghalaya State Pollution Control Board (MSPCB) ha ryngkat bad ka jingiatreilang bad ka ophis jong u Deputy Commissioner ka Ri Bhoi District, hynnin ka sngi, ki la leit ban khang khyrdep noh ia kumba 6 tylli ki karkhana kiba don ha Export Promotion Industrial Park (EPIP), Byrnihat, ha kaba ka nongrim kaba la pynlong ia ka MSPCB ba kin khang noh ia kitei ki Karkhana, ka dei hadien ba ki la pynmih tdem jaboh.

Ha katei ka jingleit jurip da ki briew ka MSPCB, ki la lap ba la don 6 tylli ki Karkhana kiba la pynmih tdem jaboh bad kiba la shah khang khyrdep noh ha ki briew ka MSPCB, ha kaba kiba la shah khang noh ha ki briew ka MSPCB, ki kynthup ia ka Shyam Century Ferro Alloys Pvt Ltd, ka Khasi Alloys Ltd, ka Nalari Ferro Alloys Pvt` Ltd, ka Pawan Casting Pvt Ltd, FW Ferro Tech Pvt Ltd bad ka SR Bio-Product Pvt Ltd.

Hadien ba la dep ban khang ia kitei ki 6 tylli ki Karkhana ba pynmih tdem jaboh, sa hynnin ka miet, ka kynhun ki ophisar na ka MSPCB, kaba la ialam da u Bah Y.F Laloo, Environmental Engineer ka MSPCB, ki la leit ban khynra sa ia ki Karkhana kiba don ha ka thain 13mer ha Byrnihat bad kiba la buh ia kor ki bor ban khmih ia ka jingkhuid ka lyer, hynrei ha katei ka jingjurip, ym shym la lap satia ia ka jingpynmih tdem jong kitei ki karkhana naba la sakhi ba ki don ki karkhana kiba la pynsangeh treikam, da kaba ki aidaw ba ki pynsangeh namar ba ki sniew.

U Bah Y.F Laloo, haba kren sha ki lad pathaikhubor, u la ong ba na ka liang ka tnad MSPCB, ki ju pynlong ia kum kine ki jingjurip na ka por sha ka por ha kylleng ka jylla, la kadei ha ka por mynsngi ne da miet ruh khnang ban lap ia kito ki karkhana kiba iaid lait iaki kyndon pynmih tdem jaboh kumba la buh iaki bad pyntip ruh ba la sdang ban pynjur ia kane ka jingjurip naduh ka 24 tarik jong u bnai Kyllalyngkot mynta u snem hadien ki jingujor kiba bun na ka liang jong ki paidbah ka thain Byrnihat.

Haba iadei bad kitei ki 6 tylli ki Karkhana kiba la shah khang noh, u Bah Y.F Laloo, u la iathuh ba ka MSPCB ka la dain kuna T. 4 lak ia ka Shyam Century Ferro Alloys Private Limited bad T. 2 lak ia ka Khasi Alloys Private Limited.