Jurip ka BJYM ia ka NEIGRIHMS

Shillong, 29 Nailur:
Ka Meghalaya Bharatya Janata Yojana Morcha (BJYM) mynta ka sngi ka la leit ban jngoh ia ka North East Indira Gandhi Regional Institute of Health and Medical Sciences (NEIGRIHMS). Ha katei ka jingleit jurip jong ki la lap ba bun ki jingdkoh ha ka rukom treikam katei ka hospital.
Kane ka seng BJYM ka la leit ban pynlong ia ka jingjurip kynsan kynsan hadien ba ka la ioh bun ki jingud na ki paidbah halor ka rukom treikam ba thurmur kane ka hospital.
Ia kane ka jingjurip la ialam da u President ka BJYM u bah Egenstar Kurkalang ryngkat ka jingdonlang bad kiwei ki dkhot ki la leit ban iakynduh ia ki katto katne ki nongtrei na ka tnad bapher bapher jong kane ka hospital ban ioh ia ka jingtip ba bniah halor ka jingtreikam kane ka hospital.“Ha ka jingiakren bad ki heh ngi la lap ba ki don bun ki jingeh ki jingduna ha kaneka hospital”, la ong u bah Kurkalang  hadien ba la wai ka jingialang.U la ong ba ka jingthmu ba ki la pynlong ia kane ka jingjurip ha kane ka hospital NEIGRIHMS ka long ban lap ia ka jingshisha halor ka jingwan ud jong ki paidbah  bad ban tip ia ka daw bad ka jingeh hha kane ka hospital, la ong uwei na ki dkhot.Ka BJYM ka la ong ba bun na ki skhim kum ka RAN, RBSY, JSY ba ka sorkar pdeng ka la pyllait khnang na bynta ban ai ka jingsumar ia ki briew ba duk hynrei ia kine ki skhim kim shym la pyntreikam bha.”Bun na ki  nongshah sumar kim ioh bynta na kine ki skhim”, la ong u bah Kurkalang.
U la ong ba RAN ka dei ka skhim jong ka sorkar pdeng ha kaba baroh ki nongshah sumar kiba hap hapoh ka longiing baduk (BPL) ki dei hok ban ioh ia kane ka skhim sumar haduh T.2 lak.
“Hynrei ia kane ka skhim haduh mynta ym pat shym la ithuh bad ka donkam ban buh da ka jingthoh  hakhmat jong ka hospital khnang ba ki paidbah kin tip ia ki skhim”, u la ong.Halor kane ka  BJYM kan pynlong ia ka jingpynshai paidbah khnang ba ki paidbah kin tip halor ki skhim ba ioh jingmyntoi.
Ka  BJYM kan sa phah jingthoh sha ka sorkar pdeng khnang ban pyntikna ba kane ka hospital kaba dei na bynta ban peit ia ka bha ka miat ki paidbah kan treikam bha.