Shillong: Mynta ka sngi u CEM ka KHADC u bah HS Shylla u la pynlong ia ka jingjurip ia ka jaka ot doh kaba don ha Mawlai Mawiong hadien ba la ioh ia ka jingujor na ki nongot doh ba kane ka jaka kam long kaba khuid kaba suba namar ka jingdon ha syndah ka jaka bret niut ne ka marten.
Haba kren sha ki lad pathai khubor u bah Shylla u la ong ba ka jingdon ka jaka otdoh hajan ka marten ka pynkhohnioh ia ki nongbam doh masi, namar ka jingsma, ka jingwan ki skain namar ka jingiajan palat.
U la ong ba un sa thoh sha ka bor synshar district ba kan peit bad bishar bha ia kane ka kam.
U Bah Shylla u la ong ba ka por ot doh ruh ka slem bha namar ba ka lah ban ot tang 3-4 tylli eiei ki masi shi sien ot, katba lada ki ot hi ka long tang 7-8 tylli ki masi ha ki jaka ot lajong jong ki nalor ba ha kane ka jaka, kam biang ka jaka buh masi namar ba duna ka jaka, nalor ka rukom bsa bam ruh kam biang.
“Ka jingsiew ruh kaba heh haduh 300 spah uwei u masi ha katei ka jaka katba lada ot hi ka kham duna bad ka la ai kam ruh ia kiwei ki kynthei kum ki nongiarap ban pynkhuid ia ki doh hadien ba la pynpra ia ka doh namar ba kin duh kam noh”, la ong u bah Shylla.
“Na ka KHADC ngi shu wan peit ia ka bha ka miet jong ki paidbah. Ha jaka ba don ka marten ym dei ban don ka jaka ot doh bad ka jingot doh da ka mashin ka la pynduh kam ruh kumba 40-50 ngut ia kiba la im da ki phew snem. Ka donkam ruh ka jaka ot doh kham bun jaka”, la ong u bah Shylla.
Katba u bah Estron Marwein uwei na ki nongot doh u la ong ba lada ka biang ka jingleh ka sorkar ne ka weng noh ia ka marten kim don eiei ban sngew pyrshah namar ba ka jingpyrshah ka long namar ba ka jingdon ka marten hajan kam shym la long kaba khuid kaba suba.
“Lada ka biang ka jingleh ka sorkar ngi pdiang khamtam lada ka marten ka don sha jngai. Ngi pyrshah ia ka jaka ba ka don hajan ka marten bad dei ban weng ia ka marten ne ban rah noh sha kawei ka jaka ba jngai na marten namar ba ka ktah ia ki nongbam bad ka ktah ruh ia ki nongot doh nongkhaii”, u la ong.
Ula kyrpad ia ka bor synshar district ban sngew ia kane ban ailad ban ot doh kumba ju long shwa kata ha ki iing ne ki jaka jongki.
U CEM ka KHADC bah HS Shylla katba u dang leit jurip ia ka jaka ot doh ha Mawlai Mawiong.
Dang shen, ki pulit na Mawlai ki la wan ai jingtip ha kine ki sngi ia ki nongot doh ka thain Mawlai ba kim dei shuh ban ot doh ha iing jongki hynrei ki dei ban wan ot ha katei ka jaka ot doh ba la pynkhreh ka sorkar.
Phi don ban ong eiei?