Shillong, 11 Jylliew:
Ka Public Accounts Committee (PAC) ka iing dorbar ka jylla ha kane ka sngi palei ka la bthah ia ka bor synshar district ka Ri-Bhoi ban pynlong biang ia ka jingjurip bad pynshong dor ia ki jaka ba la shim na ka bynta ban shna ia ka kad liengsuin ha Umroi namar ka jing mih ka kynrum kynram ha kaba iadei bad ka jinglong trai ia ki jaka ban siew ia ka bailutksan.
“Ngi la bthah ia u Extra Assistant Commissioner (Revenue) u Jona than Shylla ban pyndep ia ka kam hapoh ar taiew”, la ong u dkhot ka PAC u Bah Paul Lyngdoh.
U la ong ba ka shithi la dep phah sha ka Deputy Commissioner halor kane ka kam ha kane ka sngi Palei.
Katkum ka jingong u Bah Lyngdoh, ka PAC kham mynshwa ka la pynlong ia ka jingjurip ia ka jaka ban shna pynheh ia ka Kad Liengsuin Shillong ha Umroi ban ioh ia ka jingtip kaba bniah halor ka jingmih ka kynrum kynram halor ka rukom siew bai khyndew sha ki trai jaka kiba la ai ia ki jaka jongki ban pynheh ia kane ka kad liengsuin.
U la iathuh ba ki la pan ia ka jingtip bniah halor ka jingshim jaka bad ka jingsam ia ka bailutksan bai khyndew hapoh shi taiew.
Lah ban kdew ba ka PAC ka la shim ia kane ka kam hadien ba la ioh ia ka jingujor na ki 14 ngut ki trai jaka ba shah ktah na ka jingthmu ban pynheh ia ka kad liengsuin ha Umroi.
Shwa ia kane, u symbud myntri rangbah ba peit ia ka tnad Revenue u Dr. R.C. Laloo u la iathuh ba 17 ngut ki trai jaka kynthup ki jaka jong ki shipai kiba la ai na ka bynta ban pynheh ia ka kad liengsuin ha Umroi kim shym la pan bailutksan.
U Dr Laloo u la iathuh ba na 308 ngut ki trai jaka, tang 17 ngut kim shym la wan shakhmat ban shim ia ka bai jaka.
Ka sorkar ka la dep sam haduh mynta T.49,45,96,111, la iathuh u Dr Laloo bad bynrap ba sa T. 8 klur ka dang sah ha ka jingpeit jong ka deputy commissioner ka Ri-Bhoi.
“Ngi la long ba la khreh ban siew ia ka bai jaka lada ki trai jaka ki wan shakhmat ban pdiang. Ka bailutksan ka long T. 5,20,29,740 na ka bynta ki jaka shipai, bad T. 41,43,571 ia ki 16 ngut ki trai jaka”, la ong u Dr Laloo.
Phi don ban ong eiei?