Guwahati: Ka jingkhot pakhang shnong jong ka All Assam Students’ Union (AASU) ha ryngkat bad 30 tylli kiwei pat ki seng, ka la sdang ha ka por 5baje mynta mynstep bad kan kut haduh ha ka por 4baje nohsngi mynta ka sngi, ban pyrshah ia ka Citizenship (Amendment) Bill, 2016.
La iathuh ba ka la don ka jinglun maw ha ki jaka bapher jong ka Jylla Assam, ka la don ka jingthang shaka kali bad katei ka jingjia ka jia ha ki bynta jong ka Nalbari bad sa shibun ki kali jong ki riew shimet, ki auto rickshaw, ki trok ki la bun kiba julor ha Azara, kaba don hajan ka sor bah Guwahati. Kiwei pat ki jing iakhih kiba jur ki dang iaid ha Baksa, Lakhimpur, Dhemaji, Tezpur, Golaghat.
Ka la don ka jingkhang lad ia ki rel ba kin iaid hapdeng ka surok Guwahati bad Dibrugarh, hynrei ki pulit GRP, ki la leit ban pynpra ia ki briew kiba ia lum lymbung bad hadien kata, ki sa pyniaid ia ki rel ha katei ka jaka.